“Чингис хаан” банк нь 2019 оны арванхоёрдугаар сараас өнөөдрийг хүртэл хагас жилийн хугацаанд иргэд, харилцагч, хадгаламж эзэмшигчдийн төлбөр тооцоог саатуулах, хойшлуулах зэргээр харилцагч аж ахуй нэгж, иргэдийг хохироож байгаа талаар “Чингис хаан” банкны харилцагч хохирогчдын холбоо ТББ-аас өнөөдөр мэдээлэл хийж, Монголбанкинд шаардлага хүргүүлээ. 

"Чингис хаан" банкийг 2019 оны нэгдүгээр улиралд төлбөр гүйцэтгэх чадвартай гэдгийг хүлээн зөвшөөрч, Монголбанк цахим хуудаснаа тайланг нь байршуулсан байна. Харилцагчид энэхүү тайланд итгэж мөнгөн хадгаламж болон харилцах дансаа уг банкинд байршуулжээ. Гэтэл оны сүүлээс тус банкин дахь иргэд харилцагчдын харилцах данс болон хадгаламжийнх төлбөр тооцоо саатаж, харилцагчид хохирч байгаа юм байна. 

Монголбанк 2019 оны есдүгээр сараас “Чингис хаан” банкинд хянан шалгагчийг ажиллуулж эхэлсэн ч хяналтын үйл ажиллагаа муу, худал тайлан гаргасан гэж тус ТББ-ынхан үзэж буй аж.

 “Чингис хаан” банкны харилцагч, хохирлогчдын холбоо ТББ-ын өмгөөлөгч Л.Золзаяа: Банкны найдвартай тогтолцоо, үйл ажиллагааг Монголбанк хянах үүрэгтэй. 2019 оны нэгдүгээр сарын тайлангаар төлбөр гүйцэтгэх чадвартай гэж тус банкыг үнэлсэн. Гэтэл өнөөдөр энэ чадвар нь алдагдсан байна. Тиймээс үүсээд буй хүндрэлтэй нөхцөл байдалд харилцагчдын хууль ёсны эрх ашгийг хамгаалах үүднээс бодлого хэрэгжүүлж өгөхийг шаардаж байгаа юм. “Чингис хаан” банк өгөөдөр харилцагч биш хүмүүсийн нүдэнд хэвийн л үйл ажиллагаатай харагдаж байгаа. Тус банкинд үүсээд байгаа нөхцөл байдлыг эрсдэлтэй гэж үнэлж, тайлбарлаагүй. "Чингис хаан” банкны харилцагч хохирогчдын холбоо ТББ-ын 45 иргэн, ААН-ийн 11 тэрбум төгрөг түгжигдэж, хохироод байна.