Ардчилсан Намаас цаг үеийн асуудлаар мэдээлэл хийлээ. 

Тус намын Ерөнхий нарийн бичгийн дарга Г.Баатархүү "АН-ын ҮБХ-оос намаасаа мандат авсан 76 нэр дэвшигчээ хуулийн хугацаанд ард түмэндээ танилцуулсан. Өнөөдөр АН сонгуулийн штабаа албан ёсоор байгуулж байгаагаа мэдэгдэж байна. АН-ын сонгуулийн штабын Ерөнхий менежерээр УИХ-ын гишүүн Я.Санжмятавыг томилсон. АН хуулийн хүрээнд улс төрийн намуудтайгаа шударга, нээлттэй зарчмаар өрсөлдөнө.

УИХ-ын гишүүн Я.Санжмятав "2020 оны Их хурлын сонгууль нэлээд хүч тэнцвэргүй нөхцөл байдалд эхэлж байна. Ард түмэн МАН-д итгэл хүлээлгэж 65 суудал өгсөн ч итгэл алдарсан.  УИХ-ын сонгуульд АН-аас нэр дэвшиж байгаа 76 хүн дотроос хууль боловсруулах чадамж, улс орныхоо хөгжил цэцэглэлтэд оруулах хувь нэмрийг нь тооцож үзээд 25 эрхзүйч, 35 эдийн засагчийг оруулж байна.

Сонгуулийн бэлтгэл ажилдаа орж байгаа энэ цаг үеэс АН-руу дайралт хийж эхэллээ. Төр барьж байгаа МАН асар их хөрөнгө зарж, манай намынхныг харлуулах, заримыг нь шоронд хийж, АН-ыг ялагдуулах бодлого барьж байна. Намууд болон бие даан нэр дэвшигчиддээ хандан хар пиар хийхгүй байхыг уриалж байна.

Дээрх мэдээллийн төгсгөлд сэтгүүлчдийн асуултад хариулав. 

-АН-аас нэр дэвшиж байгаа хүмүүсийн 10 гаруй нь шалгагдаж байгаа гэсэн мэдээлэл байгаа. Энэ үнэн үү?

-13 хүнийг хууль хяналтын байгууллага шалгаж байна гэсэн гүтгэлэг явж эхэлсэн. Магадгүй сонгууль дуусахад 76 хүн дээр намайг нэмээд 77 хүнийг шоронд хийж магадгүй нөхцөлтэй байна. Энэ бол гүтгэлэг гэдгийг хэлье. Шүүхээр асуудал нь эцэслэн шийдэгдээгүй нөхцөлд гэмт хэрэгтэн болгож болохгүй.

Би аль нэг намыг гүтгэхгүй. Гэхдээ МАН 60 тэрбумын хэрэг үнэн гэдгийг намынх нь дарга хүлээн зөвшөөрсөн. Гэтэл тэд сүлжээгээр гарсан 65 гишүүнээсээ нэр дэвшүүллээ. Энэ мэтчилэн яриад байвал ярина. Гэхдээ бодитой мэдээллийн дор соёлтой өрсөлдьё гэж байгаа юм.