Засгийн газрын өчигдрийн (2020.05.20) хуралдаанаар, Агаарын замын боомтын талаар авах зарим арга хэмжээний тухай тогтоолыг батлав. Тогтоол ёсоор “Буянт-Ухаа” олон улсын нисэх буудал дахь агаарын замын хилийн боомтыг энэ оны долдугаар сарын 1-ний өдрөөс "Чингис хаан" олон улсын нисэх буудалд шилжүүлж, хилийн хяналтын байгууллагууд хяналт, шалгалт явуулахад шаардагдах зардлыг холбогдох журмын дагуу шийдвэрлэхийг Сангийн сайд, Хилийн боомтын үндэсний зөвлөлийн дарга Ч.Хүрэлбаатарт зөвшөөрөв.
Мөн хуралдаанаар, Эрүүгийн тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжээд УИХ-д өргөн мэдүүлэхээр тогтов.
-УИХ-ын гишүүн Б.Пүрэвдоржийн санаачлан боловсруулсан “Импортын барааны гаалийн албан татварын хувь, хэмжээ батлах тухай” УИХ-ын 1999 оны 27 дугаар тогтоолын хавсралтад өөрчлөлт оруулах тухай УИХ-ын тогтоолын төсөлд Засгийн газраас өгөх санал, дүгнэлтийг мөн гаргажээ.
-Өндөржүүлсэн онцгой байдалд ажиллаж байгаа албан хаагчдыг орон сууцжуулна. Тэгэхдээ зах зээл дээр байгаа орон сууцыг төр худалдан авч ойрын хугацаанд 1300-1500 айлыг орон сууцанд оруулах гэнэ. Монголбанкнаас 100 тэрбум төгрөгийг гаргах боломжтой гэж үзсэн байна.