Шинэ коронавирусийн дэгдэлтийн улмаас энэ оны нэгдүгээр сараас эхлээд есдүгээр сарын 1 хүртэл  бүх шатны сургууль болон цэцэрлэгийн үйл ажиллагааг зогсоох шийдвэр гарсан. Хичээлийг цахимаар хийсэн тул оюутнууд нэгдүгээр сараас хойш дотуур байранд амьдрахгүй болж, төлбөрөө буцаан авах асуудлыг тавьж эхэлсэн байдаг. Эл асуудлыг шийдвэрлэснээр оюутнууд дотуур байрны төлбөрийн тодорхой хувийг буцаан авч эхэлжээ. Боловсролын тухай хуулиар их, дээд сургуулийн дотуур байрны төлбөр, бүтэц, орон тоо зэрэг асуудлыг сургуулийн удирдлага, удирдах зөвлөл шийддэг. БСШУС-ын сайдын гаргасан А195 тушаалын дагуу их дээд сургуулийн захирлуудад дотуур байрны төлбөрийн асуудлыг оюутантай харилцан зөвшилцсөний үндсэн дээр уян хатан байдлаар зохицуулах чиглэлийг хүргүүлсэн. Тухайлбал, СУИС төгсөх курсийн оюутнуудын нэгдүгээр сараас хойших оюутны дотуур байрны төлбөрийг буцаан өгсөн бол 1-3 дугаар курсийн оюутнуудын дотуур байрны төлбөрийг ирэх жил рүү шилжүүлсэн байна. Энэ хичээлийн жилд төрийн болон хувийн 51 дотуур байранд нийтдээ 11854 оюутан хамрагдах хүсэлтээ өгсөн байна.  БСШУС яамнаас дотуур байранд амьдарч буй оюутнуудын судалгааг хоёр долоо хоног тутамд шинэчлэн авч байгаа аж. Мөн  одоо оюутны байранд амьдарч байгаа оюутнуудын эрүүл мэндийн асуудалд онцгой анхаарч дотуур байрны ариутгал, халдваргүйжүүлэлт, эмчийн үзлэгт байнга хамруулах зэрэг асуудлыг Боловсролын хүрээлэнтэй хамтарч хяналт тавьж байгаа гэв. Сүүлд буюу энэ сарын 15-ны өдөр дотуур байруудад очиход 381 оюутан амьдарч байгаа тоо гарсан байна. Үүнээс 218 нь гадаад оюутан. Харин дотуур байрны төлбөр харилцан адилгүй байдаг гэнэ. Ойролцоогоор  нь 400 мянгаас нэг сая орчим төгрөгийн үнэтэй байна.