Коронавирусийн халдвар ихээр тархаж байгаа умард хөрш ОХУ-д хүмүүнлэгийн тусламж болгож Монгол Улс нэг сая ам.долларын мах, махан бүтээгдэхүүн илгээхээр боллоо. Моноголын УИХ-ын дарга Г.Занданшатар ОХУ-аас Монгол Улсад суугаа Элчин сайд Искандер Азизовтой уулзахдаа мэдэгдсэнийг ТАСС агентлаг дамжууллаа. Агентлагийн мэдээлснээр мах, махан бүтээгдэхүүнийг Оросын Эрхүү муж, Буриадад нийлүүлэх юм байна.
“Монголоос үзүүлж байгаа энэ буцалтгүй тусламж нь Орос улсын коронавирусийн тархалттай тэмцэхэд хувь нэмрээ оруулна гэдэгт бид найдаж байна” гэж Монголын парламентын спикерийн хэлснийг Хятадын “Синьхуа” агентлаг эш татсан байна. Өнгөрсөн гуравдугаар сард Орос улс Монголд коронавирусийн оношлуур илгээж байсан юм.
Монгол Улсын Засгийн газар тавдугаар сарын 20-ны өдрийн хуралдаанаараа Орост нэг сая ам.долларын үнэ бүхий мах, махан бүтээгдэхүүний тусламж үзүүлэхээр шийдвэрлэсэн гэж Гадаад хэргийн сайд Д.Цогтбаатар мэдээлжээ. “Манай улс, хоёр хөрштэйгөө бүх талын стратегийн түншлэлээ дэмжиж, тэдэнтэй харилцаагаа ижил түвшинд хөгжүүлэхийн тулд гадаад бодлогын үзэл баримтлал баримталдаг. Өнөөдөр Орост нөхцөл байдал хүнд байгаа болохоор Засгийн газар нэг сая ам.долларын өртөг бүхий тусламж үзүүлэхээр шийдвэрлэлээ. Нөгөө талаар “зовох цагт нөхрийн чанар танигдана” гэсэн үг бий. Дэлхий даяар цар тахал тархаж байхад, энэ хүнд үед нөйз нөхөртөө туслах ёстой” гэж монголын Гадаад хэргийн сайд онцлон тэмдэглэжээ.
Үүний өмнө Монгол Улсын Ерөнхийлөгч Халтмаагийн Баттулга коронавирус COVID-19 ид тархаж байх үеэр БНХАУ-д айлчлахдаа 30 мянган хонь тусламж болгон өгч байсан.