ЭМЯ-ны ээлжит мэдээллээр ОХУ-аас ирсэн нэг оюутнаас коронавирус илэрсэн талаар ХӨСҮТ-ийн захирал Д.Нямхүү мэдээллээ

Тэрбээр хэлэхдээ "ХӨСҮТ, ЗӨСҮТ, Дарханы лабораторид нийт 403 хүнд шинжилгээ хийхэд нэг хүнд давьан шинжилгээгээр коронавирус илэрлээ. Энэ нь ОХУ-аас ирсэн оюутан юм. Тус оюутан ХӨСҮТ-д тусгаарлагдсан байсан бөгөөд энэ сарын 13-нд ирсэн, Батлан хамгаалахын сургуулийн оюутан. Уг сургуулиас ирсэн 57 хүн халдвар авсан нь батлагдлаа.

Тандалтын зорилгоор 13 хүнд шинжилгээ хийхэд коронавирус илрээгүй. Дархан-Уул аймагт нийт 47 шинжилгээ хийгдсэний 27 нь Алтанбулаг боомтоор орж ирсэн жолооч бол бусад нь аймгийн нэгдсэн эмнэлгэд тусгаарлагдаж байгаа иргэдийн давтан шинжилгээ юм. Мөн нэг сайн мэдээ нь хоёр хүн эдгэрч дараагийн шатны хяналт руу шилжсэн.

Ингээд Монгол Улсад коронавирусний нийт батлагдсан тоо 141, эдгэрсэн хүний тоо 28 боллоо.

Өвчтөнүүд ихэвчлэн 30-40 хоногт эмчлэгдэж байгаа юм. Дээд тал нь 56 хоног болж байсан тохиолдол бий. ДЭМБ-ын баруун бүсийн улсууд өчигдөр цахим хурал хийхэд өнгөрсөн таван сард биднийг маш сайн ажилласныг үнэлэн, онцолж хэлсэн нь маш их урам өглөө. Тус бүсийн нийт 37 орноос Монгол улсыг сонгож туршлага, зөвлөгөө хийхийг урьлаа" хэмээлээ.