Энэ жил ЕБС төгсч, их, дээд сургуульд дэвшин суралцах хүсэлтэй 30900 хүүхэд элсэлтийн ерөнхий шалгалт (ЭЕШ) өгөхөөр Боловсролын үнэлгээний төв (БҮТ)-д бүртгүүлжээ. Үүн дээр урьд жилүүдэд ЕБС-иа төгссөн ч энэ жил шалгалт өгөх 2900 хүүхэд нэмэгдэнэ. 2020 оны хувьд бас урьд жилүүдээс илүү онцлогтой болно. Дэлхий нийтэд тархсан цар тахалтай холбоотой “өндөржүүлсэн бэлэн байдал” зарласан. Ингээд ЭЕШ-ын шалгалтын журамд ямар өөрчлөлт орсныг дор хүргэе. ЭЕШ-ын тов долдугаар сарын 2-5-ны өдрийн хооронд авахаар тогтсон. Шалгуулагчид зургадугаар сарын 1-ний өдөрт багтаж бүртгэлийн дугаараа ашиглаад eec.mn сайтын булангаас суудлын хуваариа авна. Харин шалгалт авах байранд нэвтрэхэд хоёр өөр үүрэг бүхий зохион байгуулагч нар угтана.
Эхнийх нь тухайн шалгуулагчийн халууныг үзэж, гарыг нь ариутган, амны хаалт зүүхийг шаардана. Дараа нь шалгалтын байрыг халдваргүйжүүлэх, бие засах газарт урт дараалал үүсгэхгүйн тулд зохицуулалт хийнэ. Эрүүл мэндийн чиг үүрэг хүлээсэн ийм баг өмнөх жилүүдэд ажиллаж байгаагүй. Үүнийг шинэ баг хэмээн нэрлэсэн байна. Харин хоёр дахь нь орох, гарах хаалгуудыг хянаж, хүүхдүүдийн биед үзлэг хийж, гар утас, ухаалаг цаг, тооны машин гэх мэт мэдээлэл дамжуулах боломжтой эд зүйлс илэрвэл хураана. Мөн тэдний бичиг баримт бүрэн эсэхийг шалгана. Нэг танхимд шалгалт өгөх хүүхдүүдийн суух ширээ хоорондын зайг 1.5-2 метр байлгах стандарт гаргажээ. Шинэ стандартаар нэг ангид 12 сурагч сууна. Ийнхүү стандарт өөрчлөгдсөнөөр төлөвлөсөн шалгалтын байрыг 85 болгож нэмэгдүүлжээ. Ингээд шалгалтын байр орон нутагт 44, Улаанбаатар хотод 41 байх юм.
Нийслэлд байрлах төрийн өмчит их, дээд сургуулиудын босго оноо 480, хувийн хэвшлийн их, дээд сургуулиудын босго оноо 410 байхаар тогтоожээ. Харин орон нутагт байгаа бүхий л их дээд сургууль, коллежуудын босго оноо 400 байна. Босго оноог дээрх байдлаар тогтоосноор ЭЕШ-д хамрагдсан хүүхдүүдийн 75 хувь нь их, дээд сургуульд орох болзол хангана. Үлдсэн нь тогтоосон босго оноонд хүрэхгүй байх магадлалтай гэх урьдчилсан тооцоог мэргэжлийн байгууллагууд хийсэн байна. ЭЕШ авахаар бэлтгэсэн обьектууд бүрэн камержсан бөгөөд 24 цаг цагдаагийн хамгаалалтад байх юм. Ийм учраас шалгалтын сэдэв, хариу задарна гэсэн ямар ч ойлголт байхгүй хэмээн албаны хүмүүс мэдээлж байгаа билээ. Шалгалтын байранд ирэхдээ сурагчид:
I. Иргэний үнэмлэх, түүнтэй дүйцэх бичиг баримт
II. Бүрэн дунд боловсролын гэрчилгээ
III. Суудлын хуваарь
IV. Бүртгэлийн хуудсаа авч очно. Шалгалтын даалгаварт 10,11-р ангийн хичээлийн сэдэв, агуулгыг бүтнээр нь хамруулна. Харин “өндөржүүлсэн бэлэн байдал" зарласан буюу сүүлийн хагас жилд 12 дугаар ангид ороогүй хичлээлийн сэдэв агуулгыг хамруулахгүй ажээ.

ЭХ СУРВАЛЖ: "АРДЧИЛАЛ ТАЙМС" СОНИН