ЭМЯ-аас ээлжит мэдээллээ хүргэлээ. Манай улсад шинэ тохиолдол нэмэгдсэн эсэх, шинжилгээний хариунуудын талаар ХӨСҮТ- ийн ерөнхий захирал Д.Нямхүү танилцууллаа. Тэрбээр хэлэхдээ "Тавдугаар сарын 26-нд гурван лабораторид нийт 248 хүнд шинжилгээ хийхэд  долоон хүнээс коронавирусийн халдвар илэрлээ. Тэдний зургаа нь тавдугаар сарын 26-нд Москва-Улаанбаатарын онгоцоор ирж ХӨСҮТ-д тусгаарлагдсан байсан оюутан юм. Мөн тавдугаар сарын 13-нд ирж тусгаарлагдсан байсан цэргийн сургуулийн нэг оюутны давтан шинжилгээнээс коронавирус илэрлээ. ингэснээр нийт халдварын батлагдсан тохиолдол 148 боллоо.

Цэргийн сургуулийн оюутны хувьд тусгаарлагдсанаас хойш 14 дэх хоног дээр вирус илэрч байгаа нь тусгаарлалтын хугацааг 21 хоног болгосон шийдвэр зөв гэдгийг харуулж байна.

Харин сайн мэдээ нь өнөөдөр зургаан хүн эдгэрч дараагийн шатны ажиглалт руу шилжиж байгаа. 

Мөн өнөө өглөө Алтанбулаг боомтоор 340 иргэн орж ирсэн. Тэднээс 40 хүнийг ХӨСҮТ-д хүлээн авч тусгаарлалаа" гэлээ.

Түүний дараа коронавируст халдвараар өвчилсөн нь батлагдаж эмчилгээ хийлгэж байгаа иргэдийн биеийн байдал, эмнэл зүйн шинж тэмдгийн талаар ХӨСҮТ-ийн Тандалт, судалгааны албаны дарга А.Амбасэлмаа мэдээлэл өглөө.

Тэрбээр "Улсын хэмжээнд нэгдүгээр сарын 8-наас хойш 8,000 орчим хүнд тандалт судалгаа хийж, шинжилгээ авсан. Тандалт судалгааны ажлаас гадна иргэдийг тусгаарлахын өмнөх ангилан ялгалт хийх ажлыг долоон баг хариуцан ажиллаж байгаа. Нийт 287 сэжигтэй тохиолдлыг шинжилсэн бөгөөд бүх тохиолдолд онош үгүйсгэгдсэн.

Гуравдугаар сарын 10-наас хойш өнөөдрийг хүртэл Монгол Улсад зөөвөрлөгдөн орж ирж, батлагдсан 148 тохиолдол байна. Нийт тохиолдлын 94 буюу 63 хувь эрэгтэй. Халдвар авсан 8-65 насны хүмүүс байна.  Зөөвөрлөгдөн орж ирсэн тохиолдлуудын 86.4 хувь ОХУ-аас бусад тохиолдол гадаадын есөн орноос орж иржээ.

Эдгэж гарсан 43 хүн байгаа. Нэг өвчтөний эмчилгээний дундаж хугацаа 30 хоног байна. Эдгэрсэн хүмүүс 10-55 хоногийн эмчилгээ хийлгэсэн. 43 хүний 28 нь одоогоор сувилалд, 4 хүн гэрийн ажиглалтад байгаа бол 10 хүн гэрийн ажиглалтын хугацаа дууссан. Өнөөдрийн байдлаар ХӨСҮТ-д 105 хүн байна.

Улсын хэмжээнд нийт зургаан лабораторид давхардсан тоогоор 13,900 шинжилгээ хийлээ. Өвчтөний шинжилгээ өдөр бүр, тандалтын шинжилгээ 1-5 удаа хийгдэж байгаа. Мөн хилийн боомтууд дээр тандалтын зорилгоор ачаа тээврийн жолооч нарыг шинжилгээнд хамруулж байна.

ХӨСҮТ-ийн клиник тасагт зургаан баг ажиллаж байгаа бөгөөд нэг баг таван хүнтэй. Өнөөдрийн байдлаар 40 гаруй эмч, эмнэлгийн ажилтнууд эмчилгээн дээр ажиллаж байна. ХӨСҮТ-ийн хоёр лабораторид 20 гаруй хүн цаг наргүй ажиллан шинжилгээ хийдэг.

Өнөө өглөө ирсэн 340 зорчигчоос 40 хүнийг ХӨСҮТ-д тусгаарласан. Зорчигчдын дийлэнх нь оюутан, сурагчид байна" гэж хэллээ.