Баянгол дүүргийн ЗДТГазар иргэдийнхээ хүсэлтэд тулгуурлан ашиглагдахгүй байсан 400 гаруй чингэлэгийг нүүлгэсэн байна. Чөлөөлөгдсөн зайд нь хүүхдийн тоглоомын талбай болон сургууль цэцэрлэгийн өргөтгөл, явган хүний зам барьжээ.
Баянгол дүүргийн II хорооны нутаг дэвсгэрт байрлах 25 тоосгон гаражийг буулган, 180 ортой цэцэрлэгийг өргөтгөн улсын төсвийн 2.1 тэрбум төгрөгийн хөрөнгө оруулалтаар 240 хүүхдийн шинэ цэцэрлэг бариад байна. 

II хорооны иргэдийн сэтгэгдэл:

II хорооны Засаг дарга Ё.Ариунзул:

-Баянгол дүүргийн Засаг дарга С.Одонтуяа иргэдтэйгээ хамтран ажиллаж 180 хүүхдийн ортой байсан цэцэрлэгийг өргөтгөн 240 хүүхдийн ортой шинэ цэцэрлэг нэмж барьсан.Есдүгээр сарын 1-нд хүүхдүүдээ хүлээж авна. Оршин суугчид бид энэ асуудлыг олон жил хөөцөлдсөн. УИХ-ын гишүүн С.Эрдэнэ, дүүргийн Засаг дарга С.Одонтуяа, нийслэлийн ИТХ-ын төлөөлөгч Л.Нарантуяа нар төсөвт 2.1 тэрбум төгрөг суулгасан юм. Манай хоёрдугаар хороо төрийн өмчит ганцхан 66 дугаар цэцэрлэгтэй. Нэмэлтээр цэцэрлэг барья гэхээр газрын асуудлаас болоод боломжгүй байсан. Чөлөөтэй нийтийн эзэмшлийн зам, талбай маш ховор. Тиймээс бид тус цэцэрлэгийн дэргэдэх 25 тоосгон гаражийг иргэдтэйгээ хамтраад ямар ч нөхөн төлбөргүйгээр буулгасан. Иргэд маань цэцэрлэг барих гэж байгаа гэхээр асуудалгүйгээр чөлөөлж өгсөн.

Хоёрдугаар хорооны оршин суугч

-Энд өмнө нь оршин суугчдын олон гаражууд байсан. Харин дүүргээс тэдгээр гаражуудыг чөлөөлж ийм сайхан цэцэрлэгтэй болгож өглөө. Эгчид нь цэцэрлэгийн насны хоёр хүүхэд байгаа нэг нь дунд ангид, нөгөө нь бага ангид явдаг. Одоо энэ сайхан шинэ цэцэрлэгтээ явна даа. Сэтгэл хангалуун байна.

Оршин суугч \хүүхэд\

-Гараж байхад ойр орчимд ус тогтчихдог, хэцүү байсан. Дүүрэн гараж учраас гэр лүүгээ тойрч ордог байсан. Машин ирээд зогсчихно явах ч замгүй, хүүхэд тоглох талбай байхгүй. Манай 0-6 насны ач нар байгаа. Манай хороо бол цэцэрлэгийн хүрэлцээ муу, шигүү болохоор хүнд байсан. Цэцэрлэгт бүртгүүлэхийн тулд хонон өнжин оочерлож хэцүү байсан. Одоо ингээд шинэ цэцэрлэгтэй болоод үүнийгээ дагаад эргэн тойрны орчин цэвэрхэн, сайхан болсон. Оршин суугчид бид сэтгэл хангалуун сайхан байна.

ЭХ СУРВАЛЖ: "АРДЧИЛАЛ ТАЙМС" СОНИН