УИД-ийн зургадугаар давхарт гал гарсан тухай дуудлага өчигдөр 16.50 цагт Онцгой байдлын албанд ирснээр аврах ажиллагаа эхлүүлжээ. Барилга дотор байсан 11 хүнийг аварч, хоёрыг нь эмнэлэгт хүргэсэн байна. Азаар эрдэнэт хүний амь нас үрэгдсэнгүй. Юунаас болж гал гарсныг тогтоохоор ажиллаж байгаа ч урьдчилсан байдлаар зургадугаар давхарт засвар хийж байсан ажилтнууд алдсан байх магадлалтай гэж НОБГ-ын аврагч хэлсэн. Түүнчлэн нийслэлийн Онцгой байдлын газрын Гал түймэр унтраах хоёр ангийн гурван тасаг энэ галтай гурван цаг орчим “тулалдаж” унтраасан байна. Түймрийн явцад гааз дэлбэрэх аюултайг сануулж, замын хөдөлгөөнийг хааж урьдчилан сэргийлсэн ч дэлбэрэлт болж барилгын нэг хэсэг нурж, баруун урдаа унажээ. Түймэр унтраах явцад ус хүрэлцэхгүй байсан учраас нэмэлтээр зөөвөрлөснөөс гадна, ойролцоох төвийн шугам сүлжээнээс ус авах гэж оролдож байлаа.
Эргэн тойрон битүү утаатай, хортой хэмжээнд байсан ч иргэд цуглаж, гар утсаараа бичлэг хийж байсан нь цагдаагийн байгууллагын алба хаагчдад багагүй түвэг учруулсан байна.

УИД-ын барилгыг 1958-1961 онд анхны архитектур Б.Дамбийнямын зураг төслөөр, хятад барилгачид барьжээ. Дундаа хөндий онцгой хийцлэлтэй энэ барилгын загвар нь галыг давхар бүр рүү тархахад нөлөөлжээ. Учир нь дээд давхраас эхэлсэн гал дундах хөндий хэсгээр дамжин бусад хэсэгт хүрсэн байна. Одоо галын шалтгаан болон хохирлын хэмжээг тогтоохоор ажиллаж байна.
Нэгдүгээр давхарт нь супермаркет, цэцгийн болон үнэт эдлэлийн худалдаа, дээшээ тавилга, гэр ахуй, цахилгаан бараа, бэлэн хувцастай энэ барилгад хамгийн сүүлийн үеийн тоног төхөөрөмжтэй кинотеатр байрладаг байсан юм.
Гал гарсан даруй үйлчлүүлэгч болон түрээслэгч, ажилтнууд амжиж барилгаас гарсан бөгөөд гарч амжаагүй 11 иргэнийг Онцгой байдлын алба хаагчид аварсан юм. Хотын төвд гарсан энэ гал түймэр олон нийтэд хэд хэдэн зүйлийг давхар анхаарууллаа. Тухайлбал өндөр барилгад түймэр гарсан үед хангалттай өндөртэй шат байхгүйг нь олон нийтийн сүлжээнд шүүмжлэл дагуулсан. Мөн хотын төвд байгаа хэр нь усны нөөцгүй болж, улалзсан галтай хүч тэнцвэргүй “тулалдсан” нь ч шүүмжлүүлсэн. Гэсэн ч НОБГ-ын алба хаагчид бүх нөөц бололцоогоо дайчлан, шуурхай ажилласнаар галыг бүрэн унтраасан байна.

ЭХ СУРВАЛЖ: "АРДЧИЛАЛ ТАЙМС" СОНИН