Өчигдөр 16 цаг 18 минутын орчимд зүүн дөрвөн замын уулзварт цагдаагийн дэслэгч у.чойжанцан нь хуваарийн дагуу албан үүргээ гүйцэтгэж дуусаад “Монжаргалант” ХХК-ийн зоогийн газарт үдийн цайгаа захиалахаар зогсч байх мөчид гэнэт зоогийн газрын заалны хананд байрлах цахилгаанаас гал гарчээ. Энэ үед тус зоогийн газраар үйлчлүүлэхээр зогсч байсан цагдаагийн алба хаагч шуурхай арга хэмжээ авч, галын аюулгүй байдлын булангаас галын хорыг авч тухайн галыг тархахаас нь өмнө унтраажээ.
Ингээд тухайн цагдаагийн алба хаагч тус зоогийн газраас гарч явсан байна.
Зоогийн газрын ажилчид хэсэг хугацааны дараа тайвширч тухайн гал унтраасан алба хаагчид баярласан талархсанаа ч олигтой хэлж амжилгүй явуулсан байжээ. Болсон үйл явдлын талаар байгууллагынхаа удирдлагуудад хэлэхэд галын аюулаас байгууллагын эд хөрөнгийг авч, үйлчлүүлэгч ажилчдыг эрсдэлээс хамгаалсан тухайн алба хаагчийг хайж олж талархал илэрхийлэхээр болж, байгууллагынхаа хяналтын камерыг шүүж, тухайн алба хаагчийн гал унтраахын өмнөх дүрс бичлэгийг тус албаны Урьдчилан сэргийлэх хэлтсийн пэйж хуудсанд хандан явуулж, болсон үйл явдлын талаар хэлж, гал унтраасан замын цагдаагийн алба хаагчдыг олж өгөхийг хүссэн байна.
Ийнхүү ард иргэдийнхээ аюулгүй байдлын төлөө иргэний үүргээ нэр төртэй биелүүлсэн чимээгүй гавьяа байгуулсан алба хаагчийг олж, хамт олных нь өмнө “Монжаргалант” ХХК-ийн удирдлагуудын зүгээс талархал, цэцгийн баглаа, мөнгөн шагналаар урамшуулсан байна.
Алба хаагчийнхаа цаашдын ажил үйлст өндөр амжилт хүсье.