Сонгогчдыг төөрөгдүүлсэн мэдээлэл их гарч байгааг Сонгуулийн ерөнхий хорооноос санууллаа. Энэ удаагийн сонгуулийг томсгосон тойрогт зохион байгуулж байгаа тул өмнөх сонгуулиудаас ялгаатай нь олон нэр дэвшигч нэг тойрогт өрсөлдөж байна. Тухайлбал, Сүхбаатар дүүрэгт гэхэд 38 нэр дэвшигч гурван мандатын төлөө өрсөлдөж байгаа юм. Харин иргэн та сонгуулийн саналын хуудас бөглөхдөө зөвхөн тухайн тойрогт ногдсон мандатын тооны дагуу нэр дэвшигчийг сонгож дугуйлах ёстой. Гэтэл нэг намын нэр дэвшигчдийг мандатын тоогоор дугуйлна гэсэн худал мэдээлэл гарч байгааг иргэдэд анхааруулж байна. Саналын хуудсыг бөглөхдөө мандатын тоогоор гэхдээ өөр, өөр нам эвслийн гурван хүнийг дугуйлж болно. Энэ бол сонгогчийн эрхийн асуудал бөгөөд хэн нэгэн танд намын нэр, эсвэл нэр дэвшигчийн нэр заах ёсгүй. Мөн иргэн таныг аль нэр дэвшигчийн төлөө саналаа өгснийг хэн ч мэдэхгүй. Саналын хуудсанд иргэний регистрийн дугаар болон бусад бүртгэл тэмдэглэгдэн үлдэхгүй. Сонгогчийн лавлах 1800-2800 утас болон Сонгуулийн ерөнхий хорооны албан сайтнаас зааварчилгаа авч болно хэмээн СЕХ-ноос мэдээллээ.