Сонгуулийн ерөнхий хорооноос бэлтгэсэн сонгогчдод зориулсан зөвлөм­жийг уншигч та бүхэнд хүргэж байна.
-Сонгогч та саналаа өгөхдөө иргэний үнэмлэхтэйгээ очих бөгөөд гарын хурууны хээгээ даран, өөрийн иргэний бүртгэлийн мэдээллийн улсын сан дахь сонгогчийн бүртгэл, сонгогчийн нэрийн жагсаалтын цахим хувилбартай таарч байгаа эсэхийг тулган, шалгуулаад сонгогчийн бүртгэлийн хуудсаа хүлээн авна. Бүртгэлийн хуудсаа хүлээн авсан сонгогчид саналын хуудас өгнө.
-Сонгогч та саналын хуудас авч, санал бэлтгэх бүхээгт саналаа нууцаар гаргана. Санал бэлтгэх бүхээгт тухайн сонгогчоос өөр хүн байхыг хориглодог.
-Сонгогч санал өгөхдөө алдаа гаргаж, саналын хуудсанд буруу тэмдэглэл хийсэн бол саналын хуудсаа санал тоолох төхөөрөмж (саналын хайрцаг)-д хийхээс өмнө энэ тухайгаа мэдэгдэж, алдаатай хуудсыг шалгуулан хураалгаж, дахин нэг удаа саналын хуудас авч, саналаа гаргах боломжийг хуулиар олгожээ.
Тухайн тойрогт ногдсон мандатын тооноос хэтрүүлэхгүйгээр нэр дэвшигчийн өмнөх зуйван дугуйг дүүргэж будаарай
•Сонгогч та саналаа өгөхдөө тухайн сонгуулийн тойрогт ногдсон мандатын тооноос хэтрүүлэлгүйгээр нэр дэвшигчийн нэрийн өмнөх зуйван дугуйг бүрэн дүүргэж будаарай.
•Та хэдэн хүний төлөө санал өгөх боломжтойг саналын хуудасны дээд хэсэгт байрлах заавар болон санал бэлтгэх бүхээгт байрлуулсан зааварт тодорхой заасан байгаа тул сайтар уншиж танилцах хэрэгтэй.
•Саналын хуудсанд илүү тэмдэглэгээ хийсэн, санамсаргүйгээр бусад хэсэгт зураас үүсгэсэн зэргээс болж санал тоолох төхөөрөмж саналын хуудсыг автоматаар буцаадаг.
•Саналаа тэмдэглэхдээ дутуу будах, цэглэх, зөв юм уу хэрээс тэмдэг хийх зэргээр тэмдэглэвэл таны санал тоологдохгүй хүчингүй болох магадлалтай гэдгийг анхаараарай.