Өчигдөр буюу зургаадугаар сарын 21-ны өдөр орсон хүчтэй аадар борооны улмаас авто замуудад эвдрэл гэмтэл их гарчээ. Олон улсын нисэх онгоцны буудал явах зам болон Мандалговь явах замууд ихээхэн эвдэрсэн бөгөөд УБ-Налайх болон УБ-Хөшигийн хөндий гэх мэт гэмтэл гарсан замуудыг засварлахаар ажлын хэсэг гарч ажиллаж байна. Төв аймгийн Зуунмод суманд 53 хашаа, 10 орчим үерт өртсөн. Давхардсан тоогоор 81 албан хаагч ажиллаж 30 иргэний амь насыг аварсан байна. 

Төв аймгийн гурван дэд станц үерт өртсөний улмаас 400 өрх цахилгаангүй болжээ. Одоогийн байдлаар хоёр дэд станцыг засаад байна. Мөн малдаа яваад сураггүй болсон 18 настай хүүг эрэн хайх, аврах ажиллагааг хийж байна.

Цаг уур орчны шинжилгээний газраас хэт халалтын дараа бороо орсноор дуу цахилгаантай, ширүүн аадар болох магадлал өндөр гэж мэдээллээ. Өнөөдөр болон маргаашдаа төвийн аймгуудаар бороо үргэлжилж, энэ долоо хоног хүчтэй аадар бороо ихтэй байх төлөвтэй байгааг онцолсон юм.