УИХ –ын сонгуулийн саналын хуудсыг дахин тоолох ажиллагаа Баянзүрх дүүргийн санал авах байруудад өнөөдөр боллоо.

УИХ-ын 23-р тойргийн санал авах 10 дугаар хэсгийн ахлагч Б.Эрдэнэчимэг “Тойргийн хорооноос санал авах байрыг хариуцаж буй н.Энх-Очир гэдэг хүнээс саналын хуудсыг дахин яаралтай тоолж ирүүлнэ үү гэсэн заавар ирсэн. Үүний дагуу намуудын ажиглагч нарыг дуудан саналын хуудсаа тоолж, лацдаад дууслаа. Манай санал авах байр 2250 ширхэг саналын хуудас авсан. Тоолох явцад ямар нэгэн зөрүү гараагүй” гэлээ.

УИХ-ын сонгуулийн тухай хуулийн 61.3-т “Саналын хуудас хэвлүүлэх, хүргүүлэх, хадгалах үйл ажиллагааны хамгаалалтыг  цагдаагийн болон төрийн тусгай хамгаалалтын асуудал эрхэлсэн  байгууллага хариуцах бөгөөд тагнуулын асуудал эрхэлсэн байгууллага хяналт тавьж ажиллана” гэж заасан байдаг юм.

Гэтэл саналын хуудас тоолох үйл ажиллагаанд тагнуулын байгууллагын төлөөлөл оролцоогүй байна.

Энэ талаар Хуульч н.Энхбаяр “Саналын хуудас хэвлэгдээд санал авах байранд ирээд санал өгөөд дуусах бүх үйл ажиллагаа журамлагдан, хуульчлагдсан байгаа. Сонгуулийн ерөнхий хорооноос саналын хуудсыг хэвлэн санал авах байруудад уржигдар тоолж, лацдаад хүлээлгэж өгсөн. Гэтэл өнөөдөр дахин лацыг нь тайлж саналын хуудас тоолж байна. Энэ тоолох ажиллагаанд сонгуулийн хэсгийн хорооны бүх бүрэлдэхүүн цагдаагийн хамгаалалт, тагнуулын ерөнхий газрын хяналтанд явагддаг. Гэтэл энэ тоолох ажиллагаанд тагнуулын газаас хяналт тавьж буй хүн байхгүй байна. Ажиглагч гэх тав, зургаан хүн байна.  Хамгийн гол нь хэний шийдвэрээр ямар үндэслэлээр дахин тоолж байгааг бид мэдэхгүй байна. Тиймээс энэ үйл ажиллагааг хууль зөрчиж байна гэж үзэж байна” гэлээ.