Дэлхийн энх тайвны Нобелийн шагналт Дээрхийн гэгээнтэн 14 дүгээр Далай лам Данзанжамцын мэлмий гийсний 85 жилийн ой өчигдөр тохиолоо. Тэрбээр 1935 оны долдугаар сарын зургаанд Төвөдийн зүүн хойд хэсгийн Амдо мужийн Тагцэр гэх жижиг тосгоны тариачин гэр бүлд төржээ. Далай багш өөрийн төрсөн өдөр тохиож байгаатай холбоотойгоор “Долдугаар сарын зургаан бол миний төрсөн өдөр. Миний төрсөн өдрийг тэмдэглэж олон хүмүүс цугладаг байсан бол, энэ жил цуглахгүй байя. Учир нь энэ жил тахал өвчин гарсан тул хорих ёстой зүйл байна. Харин та бүхэн миний төрсөн өдрөөр УМ МА НИ БАД МИ ХУМ тарнийг 1000 болон түүнээс олон удаа уншвал төрсөн өдрийн баярын бэлэг тэр болно. Мөн та бүхэн буян хураана. Тэрхүү хураасан буянаа Жанрайсиг бурхны элч болсон намайг сэрүүн байхын төлөө зориулаарай. Та бүхэн сайхан сууж байгаарай" гэжээ. Дэлхийн бурхан шашинтнуудын хувьд тэрбээр Жанрайсиг Бурханы хувилсан дүр бөгөөд түүнийг амьд Бурхан хэмээн шүтэн дээдэлдэг байна. Дээрхийн Гэгээнтэн Далай Ламыг төрөхөд Лхамо Дондүв хэмээх нэр өгсөн ба энэ нь “Тусыг бүтээгч охин тэнгэр” гэсэн утгатай аж. Лхамо Дондүвыг дөнгөж гурван нас хүрэх үед XIII Далай Ламын хойд дүрийг эрж олох хайгуулын багийг Төвдийн засгийн газраас томилсон ба тэд хэдэн онцгой шинж тэмдгийг дагаж Гүмбүм хийдэд хүрэлцэн ирэв. Ингээд Дээрхийн Гэгээнтний эцэг эхийн арц модны мөчрөөр усны гоожуур хийсэн дээвэртэй байшинг олмогцоо шинэ Далай Лам тун холгүй байгаа юм байна гэдгийг ойлгоцгоосон байна. Гэвч тэд хүрэлцэн ирсэн зорилгоо нээлгүй зөвхөн нэг шөнө хонуулахыг гуйсан байна. Ахлах лам Кевцан ринбочэ зарлага хүн мэт хуурмаг дүр гарган гэрт оройжин хүүхэдтэй тоглон түүний хойноос ажигласаар цагийг өнгөрөөжээ. Хүүхэд түүнийг таниад “Сэрагийн лам, Сэрагийн лам” гэж хашхирсан аж. Сэра бол Кевцан ринбочийн хийд юм. Маргааш өдөр нь тэд явцгааж хэдэн өдрийн дараа албан ёсны төлөөлөгчийн зэрэгтэй буцан ирсэн байна. Энэ удаад тэд XIII Далай Ламын хэрэглэж байсан эд юмс болон өөр бас бус эд зүйлсийг авчрав. Тухай бүрд балчир хүү XIII Далай ламын эд зүйлийг зөв тодорхойлон “энэ минийх, энэ миний юм” гэж хэлж байлаа. Энэхүү сорилт нь хайгуулын багийн өмнө Далай Ламын шинэ дүр байна гэдэгт итгэхэд хүргэсэн байна. Удалгүй Такцэр тосгоны балчир хүүг шинэ Далай Ламаар тодруулсан түүхтэй.