Нийслэлд дархлаажуулалтын ажлыг өнөөдрөөс эрчимжүүлсэн. Бүх нийтийн бэлэн байдлын зэрэгт шилжсэн хугацаанд дархлаажуулалтын II тунд хамрагдах хугацаа өнгөрсөн иргэдийг бүрэн хамруулж дуусахаар төлөвлөөд байна. Өөрөөр хэлбэл, дөрөвдүгээр сарын 9-нөөс хойш дархлаажуулалтын II тунд хамрагдах байсан иргэдийг дөрвөн өдөрт багтаан хамруулж дуусах юм. Тодруулбал, “Синофарм” компанийн ВероЦелл вакцины II тун хоцролттой байгаа болон хугацаандаа хамрагдах иргэдэд дархлаажуулалт хийх хуваарийг танилцуулъя.

• Дөрөвдүгээр сарын 23-нд өнөөдөр болон дөрөвдүгээр сарын 9, 10-нд II тун хийлгэх иргэд бүрэн, дөрөвдүгээр сарын 11-нд хийлгэх байсан иргэдийн 25 хувь,
• Дөрөвдүгээр сарын 24-нд тухайн өдөр болон дөрөвдүгээр сарын 12, 13-нд II тун хийлгэх байсан иргэд бүрэн, дөрөвдүгээр сарын 11-нд хийлгэх байсан иргэдийн 75 хувь, дөрөвдүгээр сарын 14-нд хийлгэх байсан иргэдийн 10 хувь,
• Дөрөвдүгээр сарын 25-нд тухайн өдөр болон дөрөвдүгээр сарын 15, 16, 17-нд II тун хийлгэх байсан иргэд бүрэн, дөрөвдүгээр сарын 14-нд хийлгэх байсан иргэдийн 90 хувь,
• Дөрөвдүгээр сарын 26-нд тухайн өдөр болон дөрөвдүгээр сарын 18-22-нд II тун хийлгэх байсан иргэдийг тус тус дархлаажуулалтад хамруулахаар төлөвлөөд байна.

Мөн энэ дөрвөн хоногийн хугацаанд 55-аас дээш насны дархлаажуулалтад хамрагдах иргэд “Синофарм” компанийн ВероЦелл вакцины эхний тунгаа хийлгэх боломжтой.

Дархлаажуулалтад хамрагдах иргэд рүү харьяа дүүрэг, хорооноос нь холбогдож, гэрийнх нь ойролцоох дархлаажуулалтын аль цэгт, хэдний өдрийн хэдэн цагт очиж хамрагдах талаар нарийн мэдээлэл өгнө. Иймээс иргэд та бүхнээс дархлаажуулалтын цэгүүдэд дур мэдэн очиж, дараалал үүсгэхгүй байхыг хүсье. Мөн дархлаажуулалтын цэгээс хол, нийслэлийн алслагдсан хороодын оршин суугчдыг вакцинд хамруулах богино рейсийн 76 автобус иргэдэд үйлчилнэ.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС