Нийслэлийн Засаг дарга захирамж гаргаж, Улаанбаатар хотын хэмжээнд Халх голын байлдааны ялалтыг тэмдэглэх, хөшөө дурсгалуудыг сэргээн засварлах, олон нийт, залууст цэрэг эх оронч хүмүүжлийг олгох ажлын баг байгуулсан. Ойн хүрээнд олон арга хэмжээ зохион байгуулагдаж байгаа бөгөөд “Халхын гол-Бид мартахгүй” хүндэтгэлийн арга хэмжээ наймдугаар сарын 31-нд Зайсан толгой дахь Зөвлөлтийн дайчдын дурсгалт цогцолборт болох юм.  Халхын голын байлдааны ялалтад түүхэн үүрэг гүйцэтгэж, Монгол Улсын эрх чөлөө, тусгаар тогтнолыг бататган бэхжүүлэх үйлсэд үнэтэй хувь нэмэр оруулсан монгол, оросын эрэлхэг дайчдын гавьяаг мөнхжүүлэх, хойч үедээ таниулах зорилгоор энэхүү арга хэмжээг зохион байгуулж байна. Хүндэтгэлийн арга хэмжээг БСШУСЯ, Засгийн газрын хэрэгжүүлэгч агентлаг Соёл, урлагийн газар, Монгол -Орос найрамдлын нийгэмлэгээс зохион байгуулж буй бөгөөд ”Халхын гол 80” дүрслэх урлагийн үзэсгэлэн, Монгол, орос сансрын баатруудтай дурсгалын зураг татуулах, уран бүтээлчдийн тоглолт, “Мартах учиргүй 1939 он” шүлэг яруу найргийн өдөрлөг, “Зарлаагүй дайны оршил” Монголын уран сайхны киног тус тус үзэгчдийн хүртээл болно.