УИХ-ын гишүүн О.Баасанхүү мэдээлэл хийлээ. Тэрбээр:

-Төрийн ордны нэг давхарт Ардчилсан намын дэд дарга Г.Батхүү агсан амь насаа алдсанд гүнээ харамсч байна. Би ар гэрийнхнээс нь зөвшөөрөл авсны үндсэн дээр энэ мэдээллийг хийж байгаа юм. Мөн Цагдаагийн байгууллага “Шүүх шинжилгээний үндэсний төвөөс талийгаачийн дүгнэлт нь гарч байгаа” гэсэн учраас мэдээлэл хийх болсон. Үүнээс гадна зарим хэвлэл буруу зөрүү, мэдээлэл бусдад түгээж байна гэсэн мэдээлэл надад ирсэн. Ийм учраас нөхцөл байдлын талаар зайлшгүй мэдээлэл өгөх нь зөв болов уу гэж үзлээ.

Миний өрөө тухайн хэрэг учрал болсон газрын хажуу талд байдаг. Тухайн өдөр УИХ-ын чуулганы хуралдаан 18:00 цагт тараад, өрөөндөө хүмүүстэй уулзчихаад гарахдаа хүн газар унасан байхтай таарсан. Би хуульч хүн, ялангуяа 20 гаруй жил Эрүүгийн хэргийн хэрэг, хавтаст хэргийн материалуудтай танилцаж байсан хүний хувьд авах ёстой арга хэмжээ нь юу вэ гэдэг утгаар ажилласан.
Төрийн ордон бол хуультай. Энэ хуулиар Төрийн тусгай хамгаалалтын газар болон Тагнуулын ерөнхий газрын харьяанд байдаг учир тус байгууллагын зохих удирдлагуудад мэдэгдсэн. Цагдаагийн байгууллага надаас хойш ирэх учраас би нөхцөл байдлыг баримтжуулан фото зураг авсан. Түүнийгээ цагдаагийн байгууллагад хүлээлгэн өгсөн” гэлээ.

-Дуу чимээ гарахыг та сонссон уу?
-Манай өрөөнд дуу чимээ сонсогдох ямар ч боломжгүй. Учир нь дамждаг тасалгаатай. Давхар хаалгатай юм.
-Хэдэн цагт та дуудлага өгсөн бэ?
-Мөрдөн шалгах ажиллагаанд саад учруулахгүйн тулд цаг, минутыг хэлэх боломжгүй.
-Та тухайн үед талийгаачийг хараад шууд таньсан уу?
-Тухайн үед таниагүй. Таних ч боломжгүй байсан. Г.Батхүү агсны толгой орчим бүхэлдээ цус болж, хамар, амнаас нь цус гарсан байсан.