Ардчилсан намаас “Ардчилсан хувьсгалын 30 жил”-ийн ойг тохиолдуулан “Олон Улсын Ардчиллын өдөр”-ийг өнөөдөр Сүхбаатарын талбайд “Savedemocracy2020” буюу “Ардчиллаа хамгаалъя” нэртэйгээр тэмдэглэн өнгөрүүлж байна. НҮБ-ын Ерөнхий ассамблейгээс 2007 оноос хойш жил бүрийн есдүгээр сарын 15-ны өдрийг Олон улсын ардчиллын өдөр болгон тэмдэглэхээр тогтсон. Олон Улсын Ардчиллын өдрийг тэмдэглэн өнгөрүүлэх “Ардчилсан хувьсгалын 30 жил”-ийн ойн арга хэмжээ “Монгол Улс Ардчиллын замаар-30 жил” онол практикийн бага хурлаар сая эхлэв.

Өнөөдөр мөн Сүхбаатарын талбайд Олон улсын Ардчиллын өдөрт зориулсан нээлттэй өдөрлөг болох бөгөөд үүнд гэрэл зургийн үзэсгэлэн, ардчиллын түүхийг өгүүлсэн боть цуврал номны нээлт, урлагийн тоглолт, фүүд экспо, ховор автомашины үзэсгэлэн гэх мэт олон арга хэмжээнүүд болох юм. Уг арга хэмжээнд НҮБ, олон улсын байгууллага, дипломат төлөөлөгчийн газрын гадаад, дотоодын хүндэт олон зочид төлөөлөгчид урилгаар оролцож байна.

Олон улсын ардчиллын өдөр нь зөвхөн ардчилсан тодотголтой намын баяр биш, ардчиллын замаар замнаж буй тухайн улс, дэлхий нийтийн хүрээнд ардчиллын ололт амжилт, алдаа оноогоо үнэлэн цэгнэдэг өдөр. Ийн Монгол Улс Олон улсын ардчиллын өдрийг анх удаагаа тэмдэглэн өнгөрүүлснээр олон улсад ач холбогдлоо улам өргөж байгаа билээ.