Шатахуун бол бүхий л бараа бүтээгдэхүүний үнийг тодорхойлогч суурь нь байдаг. Тэгвэл шатахууны үнэ сүүлийн үед литр тутамдаа зуу, зуун төгрөгөөр нэмэгдэж иргэдийн халаасийг хоослох болсон билээ. Иймд төрийн бус байгууллагууд, иргэний нийгмийн төлөөлөл хамтарч Монголын залуучуудын холбооны байранд шатахууны үнийн хөөрөгдөл, хятадуудад өгсөн газартай холбоотой асуудлаар хэлэлцүүлэг зохион байгуулав.

Энэ үеэр машинтай жагсаал зохион байгуулагч Б.Цэгмид “Даваа гараг (өнөөдөр) буюу энэ сарын 27-ны өдрийн 13:00 цагт Төрийн ордны зүүн талд шатахууны үнийн хөөрөгдлийн асуудлаар тэмцэл өрнүүлнэ. Бидний тавьж буй шаардлага тун энгийн. Хятадуудад газар олгох гэж буй хамтын ажиллагааны гэрээг Засгийн газраас яаралтай цуцал. Хоёрдугаарт, шатахуун, мах өргөн хэрэглээний бараа бүтээгдэхүүний үнийг хязгаарлах, зөв зохистой бодлого явуулах нь Засгийн газрын үүрэг. Энэ үүргээ биелүүлэхийг шаардана. Гуравдугаарт, Засгийн газар УИХ-ыг тарахыг ёстой гэж үзэж байна. Энэхүү тэмцэл гурван хоног үргэлжилнэ” гэсэн юм.

Уг жагсаалд “Улсаа аврах ард түмний хөдөлгөөн”, “Үнэн ба зөв нам”, “Эрх чөлөөг хэрэгжүүлэгч нам”, “Хувиараа тээвэр эрхлэгчдийн нэгдсэн холбоо”, “Намгүй монгол хөдөлгөөн”, “Экологи зайсан ТББ” нар хамтран оролцох ажээ.