П.Галиндэв тэргүүтэй залуус Ардчилсан намын удирдлагууд болон гишүүд, дэмжигчид рүү дайрч, давшилсан буруу, ташаа мэдээлэл сүүлийн үед хэвлэл мэдээллийн хэрэгсэл, олон нийтийн сүлжээгээр түгэх боллоо. Энэ талаар Сонгинохайрхан дүүргийн Ардчилсан намын Хэрэг эрхлэх газрын дарга н.Хажидмаагаас тодруулахад “П.Галиндэв нэртэй залуус намын шинэчилсэн бүртгэлд хамрагдаагүй. 2017 онд Ардчилсан нам гишүүдийнхээ бүртгэлийг шинэчлэхэд эдгээр хүмүүс албан ёсоор хамрагдаагүй, гишүүнийхээ татварыг ч төлөөгүй байгаа. П.Галиндэв тэргүүтэй хүмүүс өөрсдийгөө Ардчилсан намын “Шинэчлэл” хөдөлгөөн хэмээн нэрийдэж, ийнхүү олон нийтийг төөрөгдүүлж буруу ташаа мэдээлэл хүргэж байгаа нь харамсалтай. Өнгөрсөн зургадугаар сард Сонгинохайрхан дүүргийн Ардчилсан намын хороо хурлаа зохион байгуулахад М.Чинболд, П.Галиндэв нар МАН-ын дэмжигч, гишүүдтэй хамт ирж үймүүлж байсан. П.Галиндэв нартай хамт “Шинэчлэл” хөдөлгөөн гэж яваад байгаа н.Энхсайхан гэгч нь намаас хөөгдчихсөн хүн шүү дээ” гэлээ.