Сэлэнгэ аймгийн Засаг дарга Ш.Оргилыг АТГ-аас саатуулан шалгаж байна. Түүнийг авлига хээл хахууль авсан байж болзошгүй гэх үндэслэлээр саатуулсан бөгөөд Ш.Оргилын гэр болон албан өрөөнд нь прокурорын зөвшөөрөлтэйгөөр нэгжлэг хийсэн байна. Энэ талаар Засаг дарга Ш.Оргил “АТГ-аас мэдүүлэг   авсан. Гэрчээр мэдүүлэг авсан. Ажил албан тушаалтай холбогдуулж, гэрчээр мэдүүлэг авсан” гэжээ. Ш.Оргил нь 2016 оны долдугаар сард  Сэлэнгэ аймгийн Засаг даргаар томилогдож очсон. Ш.Оргилыг УИХ-ын гишүүн Ж.Эрдэнэбат Монгол Улсын Ерөнхий сайдаар ажиллаж байхдаа захирамж гарган Сэлэнгэ аймгийн Засаг даргаар томилсон байдаг. Ш.Оргил нь НАМЗХ-ны удирдах зөвлөлийн гишүүн, Сэлэнгэ аймгийн НАМЗХ-ны тэргүүн бөгөөд инженер, эрх зүйч мэргэжилтэй. Сая АТГ-аас Ш.Оргилыг шалгахдаа Ж.Эрдэнэбатын шалгагдаж буй хэрэгтэй холбогдуулан шалгасан гэх мэдээлэл байна. Ерөнхий сайд асан Ж.Эрдэнэбат нь 2016-2017 оны хугацаанд Ерөнхий сайдаар ажиллаж байхдаа Тост, Тосонбумын нурууны хамгаалалтын бүсэд багтсан “Улаан сайр-1” талбайн тусгай зөвшөөрлийг цуцалж, “Улаан сайр-2” талбайг шинээр олгох зөвшөөрлийг өгсөн байдаг. “Улаан сайр-2” хэмээх 1462.82 га талбайг 2017 оны арванхоёрдугаар сард төрсөн дүү Ж.Эрдэнэтөгстэйгөө хамтран эзэмшдэг “Хэрх илч” компанийн нэр дээр аваад “Улаан сайр-2” талбайн тусгай зөвшөөрлөө өөрийн сайн найз “Алтай констрашкн” ХХК-ийн захирал Х.Бат-Эрдэнэд нэг саяар худалдсан гэх асуудлаар шалгаж байгаа. Ж.Эрдэнэбатыг өөрийн хамаарал бүхий “Хэрх Илч” гэх компанид давуу байдал олгож Тост, Тосон бумбын нуруунд лиценз олгосон гэж буруутгаж буй. Энэ талаар Ж.Эрдэнэбат тайлбарлахдаа “Тэр  компани нь миний дүү бид хоёрын нэр дээр бүртгэлтэй байдаг компани. Тус компани лицензийн талбай дээр хайгуул хийж үзээд юм олоогүй. Тиймээс газрын зөвшөөрлийг нь улсад буцаагаад өгчихсөн. Би тэр компаниас тодорхой хэмжээний хувь л эзэмшдэг. Хууль хяналтын байгууллагынхан үнэн зөвөөр шийднэ гэж найдаж байна” гэсэн хариултыг өгчээ.

 

Сэлэнгэ аймгийн Засаг дарга Ш.Оргил, УИХ-ын гишүүн Ж.Эрдэнэбат нар АТГ-т шалгагдаж байгаа нь тодорхой бөгөөд Ш.Оргил нэгэн ярилцлагадаа “Ерөнхий сайд Ж.Эрдэнэбатыг өмнө нь аймгаа удирдаж байхад нь багт нь орж ажиллаж байлаа. Одоо улсаа удирдаж байхад нь бас багт нь ажиллаж байна. Даргынхаа ажиллаж байсан өрөөнд нь залгамжлаад аймгийнхаа төлөө, сэлэнгэчүүдийнхээ хөгжлийн төлөө ажиллаж байгаа нь бахархал хэдий ч нөгөө талаасаа надад их хариуцлага хамт явааг байнга бодож яваа” гэж дурдсан байдаг.