Засгийн газрын өчигдрийн хуралдаанаар Тайланд, БНХАУ, ОХУ-д суух Элчин сайд нарыг томилох эсэх асуудлыг хэлэлцлээ. БНХАУ-д суух Онц бөгөөд Бүрэн эрхт Элчин сайдаар БОАЖЯ-ны Төрийн нарийн бичгийн дарга Ц.Цэнгэл, ОХУ-д суух Онц бөгөөд Бүрэн эрхт Элчин сайдаар ЗХЖШ-ын дарга асан генерал Д.Даваа, Тайланд Улсад суух Онц бөгөөд Бүрэн эрхт Элчин сайдаар Гадаад харилцааны яамны Эрхзүйн газрын дарга А.Төмөр нарын нэрийг дэвшүүлэхээр болжээ. Хэрэв энэ гурван улсад суух Элчин сайд нарыг томилохыг Засгийн газар дэмжвэл Ерөнхийлөгчтэй зөвшилцөж, УИХ-д өргөн мэдүүлэх юм.
Гадаад харилцааны сайд Д.Цогтбаатар 2019 оны тавдугаар сард Засгийн газрын хуралдаанаар зургаан Элчин сайд, НҮБ-ын байнгын төлөөлөгчөөр нэг хүн томилуулахаар хэлэлцүүлсэн. Харин Засгийн газар дэмжиж,

Ерөнхийлөгч өргөн мэдүүлэх шийдвэр гараад таван сарыг үдэж байна.
• Бүгд Найрамдах Польш Улсад суух Онц бөгөөд Бүрэн эрхт Элчин сайдаар Бархасын Дорж
• Бүгд Найрамдах Ардчилсан Лаос Ард Улсад суух Онц бөгөөд Бүрэн эрхт Элчин сайдаар Жигжээгийн Сэрээжав
• Бүгд Найрамдах Куба Улсад суух Онц бөгөөд Бүрэн эрхт Элчин сайдаар Шагдарын Батцэцэг
• Австралийн Холбооны Улсад суух Онц бөгөөд Бүрэн эрхт Элчин сайдаар Нямдоржийн Анхбаяр
• Шведийн Хаант Улсад суух Онц бөгөөд Бүрэн эрхт Элчин сайдаар Түвдэндоржийн Жанабазар
• НҮБ-ын дэргэд суух Байнгын төлөөлөгчөөр Воршиловын Энхболд
• Бүгд Найрамдах Солонгос Улсад суух Онц бөгөөд Бүрэн эрхт Элчин сайдаар Дамдинсүрэнгийн Даваасүрэн нарыг томилуулахаар Засгийн газар дэмжсэн юм.

Удтал хүлээгдсэн Элчин сайдуудын томилгоог ойрын хугацаанд УИХ-д өргөн мэдүүлэх сурагтай. Элчин сайдын томилгоо нь Ерөнхийлөгч, Засгийн газар, УИХ хооронд зөвшилцөж байж орж ирдэг чухал албан тушаал. Гэхдээ сүүлийн жилүүдэд Элчин сайд, Консулын томилгоо “шагнал”-ын албан тушаал болсон гэсэн шүүмжилж гарч буй. Мөн Ерөнхийлөгчийн зүгээс заримыг нь буцаан татаж, томилохоос татгалзаж байгаа юм.