АМНАТ-ын талаар Сангийн сайд Ч.Хүрэлбаатараас тодрууллаа.

-АМНАТ-аас болж төсвийн орлого 1.3 их наяд төгрөгөөр буурна гэж та хэлсэн ч зарим хүмүүс өөр тайлбар хэлээд байна?
-Монгол Улсын Үндсэн хуулийг зөрчсөн шийдвэрийг Цэц гаргасан. Учир нь Үндсэн хуульд хөрсөн доорх ашигт малтмал ард түмний мэдэлд, төрийн өмч байна гэж заасан. Харин Цэцийн шийдвэрээр энэ төрлийн татварыг хэн төлөх нь тодорхойгүй боллоо. Дээр нь хувь хэмжээг зохицуулсан бүх заалтыг нь аваад хаячихсан. Иймд 2020 оны төсөвт 1.3 их наяд төгрөг төвлөрүүлэх орлого эргэлзээтэй болсон гэсэн үг. Үүнээс гадна 2018 оны төсвийн гүйцэтгэлээр нэг их наяд 64 тэрбум төгрөгийн АМНАТ-ыг улсын төсөвт төвлөрүүлсэн. 2019 оны эхний есөн сарын байдлаар төсөв дээр нэг их наяд 94 тэрбум төгрөг хуримтлагдсан байсан татварыг хүчингүй болгосон.
-Цэцийн их суудлын хуралдааны шийдвэр гарчихсан учраас төсвийн орлогын бүрдүүлэлт хэд орчим төгрөгөөр буурна гэж тооцож байна вэ?
-Засгийн газрын хуралдаанаар ороод үүнийг засъя гэсэн чинь дэгээрээ УИХ өөрчлөлт хийх ёстой юм байна. Тэгэхээр УИХ дээр энэ ажил хийгдээд явж байна. Эдийн засгийн байнгын хороон дээр ажлын хэсэг гараад ажиллаж байна. Дунд нь хоног алдахгүй байхаар зохицуулаад гаргаж болно. Сангийн яам, Засгийн газрын зүгээс 1.3 их наяд төгрөгийг буулгаж болохгүй гэдэг байр суурьтай байгаа. АМНАТ бол Монгол Улсаас экспортод гаргаж байгаа зэс, төмөр, нүүрс, цайр зэрэг бүхий л бүтээгдэхүүнээсээ авдаг татвар.
-УУХҮЯ, Сангийн яамны байр суурь АМНАТ дээр зөрүүтэй байна. Хоёр яам яриад саналаа нэгтгэх боломж бий юү?
-Мэдэхгүй. Би тийм зүйл сонсоогүй. Энэ хуулийг анх Д.Сумъяабазар сайд өргөн мэдүүлсэн. Ингэхлээ Засгийн газраас санал аваад нэг саналтайгаар өргөн барьсан. Засгийн газар нэгдсэн нэг байр суурьтай байгаа.