Эрх баригч МАН бүрэн эрхийн хугацааныхаа гурван жилийн хугацааг үдэж байна. Ердөө жилийн дараа УИХ-ын ээлжит сонгууль болно. Хэдийгээр сонгууль болох хугацаа болоогүй ч МАН-ын зарим гишүүдийн сонгуулийн шоу, попролт эхэлсэн бололтой. УИХ-ын гишүүн Ж.Бат-Эрдэнэ нэг өдрийн турш таксины жолооч хийж, иргэдтэй илэн далангүй, нээлттэй ярилцсан гэнэ. Түүний энэ үйлдлийг сонгуулийн өмнөх шоу, попролт гэж харах хүмүүс цөөнгүй байна. Ямартай ч гэнэт иргэдтэй нягт ойртон ажилласан сэтгэгдлээ тэрээр өөрийн сошиал хуудсандаа ийнхүү бичжээ. 

УИХ-ын гишүүн Ж.Бат-Эрдэнэ “Ард иргэдийн амьдрал өдрөөс өдөрт унаж, иргэд маань бухимдаж байна. Асуудлуудыг мэдэхийн тулд таксинд жолооч хийж үзлээ. Өнөөдөр иргэд маань зовж байна, зүдэрч байна. Ядуурал дээд цэгтээ хүрчээ. Гишүүд минь, нөхөд минь том том зүйл ярихын оронд эхлээд ард иргэдийнхээ асуудлуудыг шийдмээр байна. Жолооч нартайгаа яриад явах үед ихэвчлэн том зүйлийн талаар бус амьдралын талаар ярьж байна. Тэд “Төрөөс амьжиргааг нь сайжруулах, ард иргэд залуучуудад боломж олгох, бензин түлш, мах өргөн хэрэглээний үнэ тэнгэрт хадлаа үүнийг яах вэ. Та хэд юу хийдэг улс вэ” гэж бухимдаж байна. Миний бие “Хүний төлөө эдийн засаг, хөгжлийн төлөө зөв бодлого” гэсэн уриатай сонгуульд орсон. Эдийн засгийн бүхий л боломжоо хүнийхээ төлөө, иргэдээ ажилтай орлоготой болгоход зориулъя гэж гурав дахь жилээ зүтгэлээ. Дэмжлэг алга. Аливаа зүйлд хийсвэрээр хөөрч попрохоос илүү бодитойгоор үйлдэл хийж төрөөс иргэдэд боломжийг нь засч өгөх нь бидний үүрэг гэдгийг гишүүд дарга нар минь ойлгоосой” гэж бичжээ.

Ингэж л гэнэтхэн нэгхэн өдрийн дотор түүнд ард иргэд маань ядуу, зүдүү амьдарч байгаа юм байна гэсэн бодол төрж, таксинд явахад хүргэсэн юм байх. Өнгөрсөн гурван жилд ухаараагүй явсан ухаан нь өнөөдөр л гэнэт гишүүдэд од харвах мэт оюун ухаанд нь орж ирсэн нь гайхамшигтай. Гишүүн Ж.Бат-Эрдэнийн араас УИХ-ын гишүүн Л.Энх-Амгалан бас ухаан суув бололтой. Тэрбээр өөрийн фэйсбүүк хуудастаа “Болсон идээнээс бүү буц гэж. Гэдэс чанасан айлыг онож буухыг морьтой явна гэхгүй өөр юу гэх билээ. Хэд сайхан огтлоод, шинэ шөл оочиход хөлс бурзайна...” гэжээ. Гэрэл зургийг нь харахад үнэхээр гүндүүгүй монгол эр хүн гэлтэй. Буугаад мордсон танихгүй айлын гэрийн шалан дээр нь сууж, гэдэс огтолж идсэн л юм байх. Үүгээрээ чухам юу өгүүлэх гэсэн юм бол. Зураг хөргөө авхуулж, сошиалаар цацах хэрэгтэй байсан ч юм уу?

Ерөөс эрх баригч намын УИХ-ын гишүүдэд ингэж попрохоос илүүтэй өнгөрсөн гурван жилд хийх ажил, шийдвэрлэх зүйлс олон байлаа. Зээлийн хүүг бууруулах нөхцөлийг бий болгох, амьжиргааны түвшинг сайжруулах, яриад байгаа эдийн засгийн өсөлтийг өрх бүрийн хаалгаар оруулах, өргөн хэрэглээний барааны үнэ өсгөж байгаа шалтгаануудаа засч, залруулах, ажлын байр нэмэгдүүлэх, бүтээн байгуулалтын ажлууд хийх гээд амласан, хийх ёстой олон чухал ажил байсан. Гэсэн ч өнгөрсөн хугацаанд эрх баригчид эрх мэдэл, сандал суудлын төлөө дотроо тэмцэлдсээр бүрэн эрхийнхээ гурав дахь жилийнхээ тэн хагасыг барлаа. Одоо ч сандал суудлын төлөөх тэмцэл нь дуусаагүй л байна. Ийм байж эрх баригч намын гишүүд арай ичгүүр сонжуургүйгээр ахин сонгогдоно гэсэн итгэл, найдвар тээж байгаа юм биш биз дээ?