Хэрэв дээрх мэдээлэл үнэн бол Т.Бадамжунай гишүүн “тусгай санг цөлмөгч”-дийн загалмайлсан эцэг болох нь. Т.Бадамжунай гишүүний хувьд одоогоос найман жилийн өмнө  ЖДҮХС-аас 500 сая төгрөг завшсан хэргээр Улсын мөрдөн байцаах газарт шалгуулж байсан түүхтэй билээ. Харин түүнээс үлгэр жишээ авсан МАН-ын эрх баригчид өнөөдөр “хөг”-өө хөлдөө чирч явна.

 Яг жилийн өмнө жижиг дунд үйлдвэрлэлийг дэмжих сангаас хөнгөлөлттэй зээл авсан гишүүдийн нэрс ил болж, нийгэмд шуугиан тарьж байлаа. Ерөнхий сайд У.Хүрэлсүх Ж.Эрдэнэбатын Засгийн газрыг огцруулахын төлөө кноп дарсан гишүүдэд урамшуулал болгож энэхүү зээлийг өгсөн гэдэг. Энэ хэрэгт одоогийн УИХ дахь МАН-ын бүлгийн 51 гишүүний нэр холбогддог ч өнөөдөр тэд бүгд “цагаадсан”. Өнөөдөр тэдний өмнөөс УИХ-ын гишүүн, ХХААХҮ-ийн сайд асан Б.Батзориг болон тус яамны мэргэжилтнүүд болох зургаан хүн ял авахаар болоод байгаа юм. 

 Жилийн гурван хувийн хүүтэй зээл авсан ЖДҮ-чин гишүүдийн дуулиан намжаагүй, хэргээ хүлээж амжаагүй байхад, жилийн 0 хувийн хүүтэй Тариалан эрхлэлтийг дэмжих сангаас зээл авсан улс төрчдийн хэрэг мандсан. Гэвч өдгөө бас л таг. Тус сангийн нийт авлага 2018 оны есдүгээр сарын 3-ны байдлаар 132,0 тэрбум төгрөг байсан бол үүнээс 72.1 тэрбум төгрөг нь хугацаа хэтэрсэн чанаргүй зээл юм. Өөрөөр хэлбэл ТЭДС-чид улсад эгүүлэн төлөх ёстой 72 тэрбум төгрөгийг залгичхаад дуугүй суусаар буй.
УИХ-ын гишүүн Ж.Энхбаяр, БОАЖ-ын сайд Н.Цэрэнбат, МАН-ын генсек Д.Амарбаясгалан нар ЖДҮХС-аас гадна Тариалан эрхлэлтийг дэмжих сангаас зээл авсан нь нотлогдоод байгаа аж. Тодруулбал, Ж.Энхбаярын хамаарал бүхий “Газар агро” ХХК ТЭДС-аас 2017 онд 0 /тэг/ хувийн хүүтэй нэг тэрбум төгрөгийн зээл аваад төлж дууссан тухайгаа хэвлэлд ярьсан байна. Харин БОАЖ-ын сайд Н.Цэрэнбатын “Булган буудайн түрүү” ХХК ТЭДС-аас 150 сая төгрөг хүртжээ. Харин МАН-ын генсек Д.Амарбаясгалангийн хувьд “Тайшир өргөө” компаниараа ТЭДС-ийн зээлээс 2017 онд 1,6 тэрбумыг хүртээд, төлөөгүй байгаа гэнэ. Тэднээс гадна Ерөнхий сайд асан Н.Алтанхуяг, “Гацуурт” ХХК-ийн захирал Л.Чинбат нарын нэр ТЭДС-тай холбогддог. Тэрээр Шинэчлэлийн Засгийн газрыг тэргүүлж байхдаа өөрийн хамаарал бүхий “Хаан жимс Эс Би Ти” компаниараа дамжуулан 750 сая төгрөгийн зээлийг ТЭДС-аас долоон жилийн хугацаатай авсан байна.
Харин Л.Чинбат захирлын “Гацуурт” ХХК ТЭДС-гаас 2.1 тэрбум төгрөгийн урамшуулал илүү авсан гэх хэрэг хууль шүүхийн шатанд шалгагдаж дуусаагүй  явна.

 Ажил орлогогүй хүмүүсийг дэмжих зориулалттай Хөдөлмөр эрхлэлтийг дэмжих санг цөлмөсөн хэрэгт шалгагдаж буй УИХ-ын эмэгтэй гишүүдийн нэрс тодорхой болжээ.
1. М.Оюунчимэг “Сэрмүүн өнгө” гэх хэвлэл, хаяг, реклам бэлэг дурсгалын чиглэлээр үйл ажиллагаа явуулдаг компанид 50 сая, “Эгшиглэн магнай” компанид 50 сая, “Хүрээ айл” төсөл хэрэгжүүлэхэд нь 40 сая төгрөгийг тендерт оролцуулалгүйгээр шууд олгуулахад,
2. Н.Оюундарь Сэлэнгэ аймгийн Шаамар сум дахь “Ээж оюу сайхан” компанид олон улсын жишигт нийцсэн авто зам засвар, авто угаалгын газар байгуулах зорилгоор 100 сая төгрөг олгуулахад,
3. Н.Амарзаяа Өмнөговь аймгийн “Амин хэлхээ байгаль сан”-д 123,9 сая төгрөг олгуулахад
4. А.Ундраа 1990 онд төрсөн Т.Жаргалсайхан гэх иргэнд “Хагас дамжуулалтын чип дизайн хөгжүүлэх ” төсөл нэрээр 100 сая төгрөгийн зээл олгуулахад
5. Б.Саранчимэг нь “Монгол сор хөгжил Олон улсын академи ” ТББ-ийг зөөлөн тоглоом, даавуун эдлэл хийлгэхээр 200 сая төгрөгийг тендергүйгээр олгуулахад
6. Ц.Цогзолмаа Иргэн Б.Тамирт мал аж ахуйн ферм ажиллуулахад 150 сая төгрөгийн зээл авахад нөлөөлсөн байж болзошгүй гэсэн үндэслэлээр шалгагдаж байна.
Дээрх зээлүүд нь УИХ-ын гишүүн Н.Номтойбаярыг Нийгмийн хамгаалал, хөдөлмөрийн сайд байхад олгогдсон. Зээлийг хариуцаж байсан ХХҮЕГ-ийн даргаар Б.Нямдавааг Н.Номтойбаяр томилуулсан. Хэргийн талаар Б.Нямдаваа: “Н.Номтойбаяр сайдын тушаалаар 27 аж ахуйн нэгжид тендерийн шалгаруулалтгүйгээр 2.7 тэрбум төгрөг шилжүүлсэн. УИХ-ын 17 гишүүн, гурван сайд, хоёр төрийн нарийн бичгийн дарга, хоёр дэд сайд, аймаг, дүүргийн хоёр Засаг даргын хамаарал бүхий компани, аж ахуйн нэгжүүдэд санхүүжилт олгосон” хэмээн мэдүүлжээ.
Уг зээлийн зориулалт нь ажилгүйдлийг бууруулах зорилгоор Халамжаас орлогогүй , хөгжлийн бэрхшээлтэй, мал цөөтэй.... зэрэг иргэн, аж ахуйн нэгжид дээд тал нь 3-20 сая төгрөгөөр олгодог зээл байжээ. Гэтэл манай УИХ-ын гишүүд 10 дахин нэмэгдүүлэн танил талдаа өгсөн байж болзошгүй хэрэгт шалгагдаж байна.