УИХ-ын Өргөдлийн байнгын хорооны өчигдрийн (2019.12.10) хуралдаанаар "Эрдэнэс Тавантолгой" компанийн 1072 хувьцаа эзэмшигчдэд ногдол ашиг хуваарилах асуудлаар Уул уурхай, хүнд үйлдвэрийн сайдын мэдээлэл сонсохоор байв. Гэтэл УУХҮ-ийн сайд Д.Сумъяабазар уг хуралд ирсэнгүй. Харин тус яамны төрийн нарийн бичгийн дарга Г.Нандинжаргал, “Эрдэнэс Тавантолгой” компанийн удирдлагууд мэдээлэл өглөө. Иргэд “Эрдэнэс Тавантолгой” компанийн хувьцааны ногдол ашгаа авахын тулд нэгдэж УИХ-ын Өргөдлийн байнгын хороонд ханджээ. Тус байнгын хороонд 25 мянган иргэний гарын үсэгтэй бичиг ирсэн учраас уг асуудлыг хэлэлцсэн байна. УУХҮЯ-ны Төрийн нарийн бичгийн дарга Г.Нандинжаргалын мэдээлснээр “Эрдэнэс Тавантолгой” компанийн нийт хувьцааны 14.6 хувийг иргэд, 0.5 хувийг аж ахуйн нэгжүүд эзэмшдэг аж. Өнгөрсөн оны ашгаас нэгж хувьцаанд 25 төгрөгийн ногдол ашиг өгөх тооцоо, шийдвэр гарч байсан. Нийт хувьцаа эзэмшигч иргэдэд 55 тэрбум төгрөг тарааж өгөх байжээ. Тэгвэл 1072 хувьцаатай нэг иргэнд 27 мянган төгрөг ногдох юм байна. Харин Засгийн газар иргэдийн хувьцааны ногдол ашгийг төмөр замын бүтээн байгуулалтад хуваарилах шийдвэр гаргасан. Уг нь Ерөнхий сайд У.Хүрэлсүх ажлаа хүлээж аваад “Иргэдэд “Эрдэнэс Тавантолгой” компанийн 2018 оны ашгаас 1072 хвуьцаа, “Эрдэнэс Монгол” компанийн давуу эрхийн нэг хувьцааны ногдол ашиг өгнө” хэмээн мэдэгдэж байсан. Гэвч яг өгөхдөө тулахдаа хэлсэн мэдэгдэл, гаргасан шийдвэрээсээ няцсан билээ. Үүнийгээ “Иргэдээс санал авсан. Тэд бүтээн байгуулалтад зарцуулах ёстой гэж үзсэн” хэмээн тайлбарлаж байсан юм. Тэгвэл УИХ-ын өргөдлийн байнгын хорооноос Засгийн газарт 2019 оны цэвэр ашгаас 1072 хувьцаанд ногдох ногдол ашиг өгөх асуудлыг судалж шийдвэрлэх чиглэл өглөө.