УИХ-ын Төрийн байгуулалтын байнгын хороо өчигдөр (2019.12.17) хуралдлаа. Хуралдаанаар УИХ-ын сонгуулийн хуулийн төслийн анхны хэлэлцүүлгийг хийсэн юм. Гишүүд санал өгөхөд сонгогчдын нэрсийн жагсаалт, мэдээллийг улс төрийн намуудад өгөх эсэх, гарын хурууны хээн дээр тэмдэглэгээ хийх эсэхийг асууж байв. Учир нь сонгуульд оролцож байгаа намуудад сонгогчийн нэрсийн жагсаалтыг өгдөг байсан аж. Гэтэл иргэний ямар ч мэдээлэл хаалттай байх, иргэний зөвшөөрснөөр шүүх, прокурорт өгнө гэж хуульд заасан байдаг. Сонгууль өгсөн тэмдэглэгээ хийхэд харшилтай хүмүүсийн хуруу нь түлэгдсэн гэж СЕХ-ноос нөхөн төлбөр авсан тохиолдол цөөнгүй гэнэ. Тиймээс сонгуульд саналаа өгсний дараа тэмдэглэгээ хийх эсэх нь одоогоор тодорхойгүй байна. Биеийн давхацсан өгөгдлөөр хоёр удаа санал өгөх боломжгүй гэж УБЕГ-ын дарга н.Баасандорж онцолсон юм.

УИХ-ын гишүүн О.Баасанхүү:
-Шүүхээр авлига, албан тушаалын хэргээр ял эдэлж байсан хүмүүс нэр дэвшиж болохоор байгаа. Бас намдаа хайртай бол намайг дугуйлаарай гээд нэр дэвшигчид нь ордог. Томсгосон тойргийн онцлог тэр. Энэ бүхнийг зохицуулах хэрэгтэй. Хөгжлийн бэрхшээлтэй иргэд нэр дэвших квотыг яагаад оруулахгүй байгаа юм.

Ажлын хэсэг:
-Эрүүгийн хэргээр шалгагдаж байгаа хүн нэр дэвшихийг хориглосон заалт хуулийн төсөлд байгаа.

СЕХ-ны дарга Ч.Содномцэрэн:
-Өмнө нь ял шийтгүүлж байгаад хугацаа нь дууссан бол ялгүйд тооцож сонгуульд оролцуулна. Харин ял эдэлж байгаа бол сонгуульд нэр дэвшихийг хориглоно гэж ажлын хэсэг дээр ярьсан.
Ийнхүү гишүүд асуулт асууж, хариулт авсны дараа зарчмын зөрүүтэй саналын томьёоллоор санал хураалт явуулав. УИХ-ын сонгуулийг олон мандаттай тойргоор явуулахыг байнгын хорооны хуралдаанд оролцсон 11 гишүүний найм нь дэмжлээ.