Зам тээврийн сайд байсан Б.Цогтгэрэл Төрийн ордонд болсон Монгол Улс, ОХУ-ын Засгийн газрын хоорондын комиссын хуралд оролцжээ. Хоёр улсын хамтарсан ажил хэрэгч хурал дээр МАН-ын гишүүн, дэд сайд байсан Б.Цогтгэрэл Сүхбаатарын талбайг дүүрэн цугласан иргэд, сөрөг хүчний эсэргүүцлийн жагсаалыг “Америкийн дэмжигч АН өнөөдрийн бидний энэ хурлыг эсэргүүцэж жагсаал хийж байгаа юм” гэж ОХУ-ын төлөөлөгч нарт тайлбарлан хэлсэн байх юм. Чухамдаа Монгол, Оросын Засгийн газрын хоорондын комиссын ажил хэрэгч уулзалтыг эсэргүүцэж Сүхбаатарын талбай дээр иргэд цуглаагүй нь тодорхой. Олонх болсон МАН-ын УИХ, У.Хүрэлсүхийн Засгийн газрын өгөөжгүй үйл ажиллагааг шүүмжилж, ард түмэн ядуурч байгаа учраас амлалтаа биелүүлэхийг шахаж шаардан сөрөг хүчний жагсаал болж буйг хэн бүхэн сайн мэднэ. Тэгтэл сайд байсан хүн Монгол Улсын гадаад бодлогын хүрээнд болж буй улс хоорондын албан уулзалтад оролцохдоо “Бидний энэ хурлыг гадаа талбайд эсэргүүцээд Америкийн дэмжигч тал жагсаад байна” гэж хэлсэн нь улс төрийн ноцтой том алдаа болж байна.

Монгол, Орос, Америк улсын дунд яс хаяж, худлаа улстөржүүлсэн мэдээлэл тарааж буй нь Монгол Улсын гадаад бодлогод цаашид хэрхэн нөлөөлөх вэ, улсын нүүр царай болж буй албан хүний зохисгүй тайлбар Монголыг ичгэвтэр, доош татах болж буйд хэн хариуцлага хүлээх вэ. Манай улс тэр дотроо МАН боловсон хүчнийхээ бодлогод цаашид анхаарахгүй бол энэ мэт улсын нэр нүүрийг сэвтүүлсэн, улс төрийн ноцтой алдаанд хүрсээр байх уу?