УИХ-ын Халдашгүй байдлын дэд хороо баасан гарагт (2020.01.24) гурван цаг гаруй хуралдлаа. Хуралдаанаар УИХ-ын гишүүн Н.Номтойбаярын бүрэн эрхийг түдгэлзүүлэх Ерөнхий прокурорын саналыг хэлэлцсэн. УИХ-ын гишүүн, ХЗДХ-ийн сайд Ц.Нямдоржоор ахлуулсан Халдашгүй байдлын дэд хороо Д.Лүндээжанцан, Ч.Улаан, Н.Энхболд, Ө.Энхтүвшин нарын бүрэн бүрэлдэхүүнээрээ хуралдсан. Хуралдаанд УИХ-ын гишүүн Н.Номтойбаяр, Ерөнхий прокурор Б.Жаргалсайхан нар оролцов.

Халдашгүй байдлын дэд хорооны дарга Ц.Нямдорж:
-Хуралдаан хаалттай явагдсан. Нууцын зэрэглэлтэй. Н.Номтойбаярын УИХ-ын гишүүний бүрэн эрх нь хэрэг шалгахад саад болж байгаа гэсэн. Ийм учраас бүрэн эрхийг түдгэлзүүлж байгаад шалгуулах нь зүйтэй гэж аль аль талдаа ярьж байна хэмээв.
-Бүрэн эрхийг нь түдгэлзүүлэх гол үндэслэл юу вэ?
-Мөрдөн байцаалтын ажилд саад учруулж байна. Мөрдөн байцаалтын нууц задруулж байна гэж Ерөнхий прокурор ярьсан. Гол асуудлаа шалгаад явах хэрэгтэй. Хариуцлагатай прокурор түдгэлзүүлэх санал оруулж ирсэн болохоор хариуцлагаа цаашид хүлээх байх.