Авто тээврийн тухай хуулийн шинэчилсэн найруулгад буруу хүрдтэй буюу “Приус” маркийн автомашиныг хориглох тухай заалт оруулжээ. Энэ талаар УИХ-ын гишүүн, Зам, тээврийн хөгжлийн сайд Б.Энх-Амгалангаас тодрууллаа.

-Буруу талдаа хүрдтэй автомашиныг 2021 оноос хориглох тухай УИХ дээр яригдлаа. Та яг сарын өмнө үүнийг үгүйсгэж байсан. Тайлбар өгнө үү?
-Авто тээврийн тухай хуулийн шинэчилсэн найруулгыг яамнаас өргөн барьсан. Тухайн хуулинд 2021 оноос хойш буруу талдаа хүрдтэй автомашиныг цэгцэльe, олон жилийн насжилттай автомашиныг хориглоё гэсэн заалт оруулсан. Яамны зүгээс эдгээр заалтыг эхний хэлэлцүүлгээр татаж авах гэж байгаа. Өнөөдөр ард түмний амьжиргаа муу байгаа. Ард түмний гол унаа болсон “Приус” маркийн машиныг буруу хүрдтэй учраас татаж авна гэсэн ойлголт байж болохгүй.
-Агаарын тээврийн либeралчлалтай холбоотой асуудалд ямар байр суурьтай байгаа вэ?
-Өрсөлдөх чадварыг нэмэгдүүлэх үүднээс агаарын тээврийн салбарыг либeралчлах хэрэгцээ шаардлага байгаа. Учир нь агаарын тээврийн шатахууны ханш өндөр байгаагаас үүдэн тасалбарын үнэ нэмэгдэж байна. Монгол руу нисч ирэх нь Зүүн өмнөд Азид очоод, гурав хоног амрах үнэтэй адил байна. Гэхдээ либeралчилна гээд үндэсний агаарын тээврийнхээ амыг барьж болохгүй. Одоогоор БНСУ-ын гурван компани бидэнтэй хамтрах санал ирүүлсэн байгаа. Ирэх долдугаар сарын 5-наас "Asiana" компани явж эхэлнэ. Японы нэг компани сонирхлоо илэрхийлсэн байгаа. Тиймээс Бээжин чиглэлд билетны үнэ буурна. Мөн "Turkish airline" том онгоц нисгэх хүсэлтэй байна. Тиймээс Европын чиглэлд үнэ буурна гэж харж байгаа. Япон улсаас мөн манай руу нисэх саналаа тавьж байна. Ойролцоогоор тасалбарын үнэ 40 хувиар буурах боломжтой гэсэн урьдчилсан таамаг байна.
-Тийзний үнэд шатахуун нөлөөлж байна. Шатахууны үнийг буулгах чиглэлд хэрхэн анхаарч ажиллаж байна вэ?
-Шатахууны хувьд "Роснефть"-тэй бид гурван удаа хэлэлцээрт орсон. Ингээд “Роснефть” дэлхийн зах зээлийн буюу Сингапурын үнээр тогтмол нийлүүлэх амлалт өгсөн. Өөрөөр хэлбэл, дундын зуучлагчгүй шууд шатахуун авах тохиролцоонд хүрсэн. Ингэснээр төмөр зам дээр гэхэд 21 тэрбум төгрөгтэй холбоотой шатахууны асуудал байдаг. Энэ мөнгийг Монголдоо үлдээвэл тэнд ажиллаж байгаа 16 мянган хүний нийгмийн халамжид зарцуулж болно гэж үзэж байна. Үндсэндээ онгоцны шатахууны үнэ 17 хувиар буурах боломжтой болно гэсэн үг.
-Дарханы зам засварын ажил хэзээнээс эхлэх вэ?
-Дарханы замын нээлт энэ сарын 18-нд болно. Одоо түр замын ажил явагдаж байгаа. Азийн хөгжлийн банкны шалгаруулалт болж, таван компани шалгарсан. Ингээд замын ажилд ороход бэлэн болоод байгаа.