Үндсэн хуулийн цэцийн гишүүн Б.Ганзоригийн бүрэн эрхийн хугацаа өнгөрсөн дөрөвдүгээр сард дуусгавар болсон. Д.Ганзориг өмнө нь УИХ-аас цэцийн гишүүнээр томилогдож байжээ. Тиймээс энэ удаад түүний оронд томилох хүнийг УИХ-аас санал болгож байгаа аж. Харин УИХ-ын дарга Г.Занданшатар даваа гарагт болсон МАН-ын бүлгийн хуралдаанд Үндсэн хуулийн цэцийн гишүүнээр ЗГХЭГ-ын дэд даргаар ажиллаж буй Г.Баясгаланг нэр дэвшүүлж байгаагаа танилцуулжээ. Бүлгийн хурлаар энэ асуудлыг хэлэлцээд мэргэжлийн хүн санал болгосон байна гэж үзээд, УИХ-ын даргын саналыг 100 хувь дэмжсэн байна. Ингэснээр Үндсэн хуулийн цэцэд Г.Баясгаланг нэр дэвшүүллээ. Томилгоог энэ долоо хоногийн Байнгын хороо, чуулганаар хэлэлцэнэ. Г.Баясгалан нь Москвагийн их сургуулийг хуульч мэргэжлээр төгссөн, хууль зүйн ухааны доктор, төрийн захиргааны тэргүүн түшмэл, хууль цаазны итгэмжит төлөөлөгч юм. Өмнө нь улсын Ерөнхий прокурорын газарт хяналтын прокурор, зөвлөх, Хууль зүйн яамны газрын дарга, Хууль зүй Дотоод хэргийн яамны Төрийн нарийн бичгийн дарга болон Монгол Улсын Ерөнхийлөгчийн хуулийн бодлогын зөвлөх зэрэг албыг хашиж байжээ.