Энэ жилийн төв талбай дээрх хүүхдийн баяр сумдын ойгоос арай доохнуур хэмжээнд “аятай сайхан” болж өндөрлөлөө. Амиа алдахаас айдаггүй Ерөнхий сайд бие хамгаалагчдаараа хүрээлүүлэн “айдас хүйдэс”-тэйгээр индэр дээр гарч ирсэн. Ингээд баяраа тэмдэглэн яваа хүүхдүүд, эцэг эхчүүдийг “үүрэгдэв”. Ерөнхий сайдын Монголын хүүхдүүдэд буулгасан лүндэнгээс сийрүүлбэл; “Сүүлийн жилүүдэд хүүхдүүдийн маань тоглодог паркийг, сургууль, цэцэрлэгийн газрыг үе үеийн газрын наймаачид зараад үгүй хийчихсэн байна аа. Энийгээ эргүүлж олж ав аа!. Тэр найрамдал зуслангийн чинь газрын талыг луйварчид авсан байна аа, тэрийгээ эргүүлж олж ав аа!. Хүүхдийн паркаа очиж шалгаа! Сургууль цэцэрлэгийн талбайнуудаа эргүүлж ав аа, наад луйварчдаасаа!” гэж эхэлсэн үгсээ хүчингийн хэргийн тухай хар бараан мэдээллээр үргэлжлүүлэв. Эцэст нь дэмжиж байвал алгаа нэг сайхан ташчих ... гэлээ. 

Солонгос киноны дээрмийн бүлгийн гишүүний дүрээр л хардаг хар шилтэй ах ямар боевик киноны хэсгээс ярьсныг тэнд явсан багачууд байтугай томчууд ч ойлгосонгүй. Томчууд нь ямартаа ч “Алгаа таш” гэснийг ёсоор болгож “Дэмж” гэснийг нь бодоод сонгуулийн сурталчилгаа юм байлгүй дээ гээд хоцров.
Хар шилтэй атаман ах аа! Тэр сургууль, цэцэрлэг, зуслангийн газрыг чинь, танай намынхан чинь, таны удирддаг дарга нар чинь идчихсэн байна лээ... Тэрийгээ эргүүлж олж өгөөрэй!