Монгол Улсын Ерөнхийлөгч Х.Баттулга хоёрдугаар сарын 27-нд БНХАУ-д нэг өдрийн айлчлал хийж ирээд дагалдан явсан хүмүүсийн хамт Улсын онцгой комиссын дүрэм, журмын дагуу шинжилгээ өгч 14 хоногийн хөл хорионд ороод байна. Ерөнхийлөгчийг тусад нь буюу Улсын хоёрдугаар эмнэлэгт тусгаарласан байна. Харин Ерѳнхийлѳгчтэй хамт явсан Гадаад Харилцааны сайд Д.Цогтбаатар, Монгол Улсаас БНХАУ-д суугаа Онц бөгөөд Бүрэн эрхт Элчин сайд Д.Ганхуяг, Онцгой Байдлын Ерөнхий Газрын дарга, хошууч генерал Т.Бадрал, Ерөнхийлөгчийн Тамгын газрын дарга Ө.Шижир, Ерөнхийлөгчийн Гадаад бодлогын зөвлөх Т.Тэгшжаргал нарын албаны хүмүүсийг Хан-Уул дүүргийн нутаг дэвсгэр Жаргалантын аман дахь ОБЕГ-ын харьяа сувилалд тусгаарлажээ.
Ерөнхийлөгч Х.Баттулга БНХАУ-ын Дарга Си Жиньпинтэй уулзлаа. Энэ нь хоёр улсын Төрийн тэргүүний тав дахь удаагийн уулзалт юм. Ерөнхийлөгч Х.Баттулга уулзалтын эхэнд БНХАУ-д шинэ төрлийн коронавирусийн (Covid-19) халдвар дэгдэж, Хятадын ард түмэн сэтгэл санааны хохирол амссан явдалд эмгэнэл илэрхийлж, монголчууд “Тэнхлүүн явахад тэмээгээр тусалснаас тэвдэж явахад тэвнээр тусал”, “Зовох цагт нөхрийн чанар танигдана” гэж ярьдаг шигээ эртний сайхан ёсоор энэ удаад хүрэлцэн ирлээ хэмээн найрсгаар мэндчилсэн байна.Тэрбээр БНХАУ-ын дарга Си Жиньпинтэй “COVID-19”-ийн халдвартай хамтран тэмцэх талаар санал солилцсон аж. Үүнээс гадна Монголын ард түмэн БНХАУ-д 30 мянган хонь хандивлаж буйг дуулгажээ. Мөн ноён Си Жиньпинээр удирдуулсан БНХАУ-ын ард түмэн шинжлэх ухаанд суурилсан тэмцэл, хичээл зүтгэлийн хүчээр цар тахлыг зогсоох нь дэлхий нийтэд ч тустай үйл болно гэдэгт итгэлтэй байгаагаа илэрхийлсэн юм.
Ерөнхийлөгч Х.Баттулга “БНХАУ-тай хуурай газраар хамгийн урт хиллэдэг (4709,6 км) хөрш орны хувьд коронавирусийн асуудалд Монголын ард түмэн ч санаа зовж байгаа. Цаг үеийн байдалтай холбогдуулан хоёр орны хооронд зорчих хөдөлгөөнийг хязгаарласан ч коронавирусийн тархалт буурсны дараа хэвийн болж, худалдааны эргэлт, эдийн засгийн хамтын ажиллагаа улам сайжирна гэдэгт итгэлтэй байгаа”-гаа хэллээ.
 БНХАУ-ын дарга Си Жиньпин тус улсад үүссэн нөхцөл байдлыг үл хамааран Монгол Улсын Ерөнхийлөгч Х.Баттулгыг эх оронд нь хүрэлцэн ирсэн явдалд гүн талархал илэрхийлж, “Надад дуслыг өгсөн ч би голыг эргүүлэн өгнө” хэмээх Күнзийн сургаал болон “Зовох цагт нөхрийн чанар танигдана” гэдэг Монголын зүйр үгийг эш татан чин сэтгэлийн талархал илэрхийлэв. Мөн халдварт өвчин гарснаас хойш БНХАУ-д хийсэн Төрийн тэргүүний анхны айлчлал гэдгийг онцолж, энэ удаагийн айлчлал нь Иж бүрэн стратегийн түншлэлийн харилцаандаа шинэ боломж гаргах завшаан хэмээн тэмдэглэлээ.
Уулзалтын үеэр талууд коронавирусийн дэгдэлт нь ганцхан улсын асуудал биш. Иймд хамтран ажиллах нь зүйтэй гээд цаг үеийн асуудлаар дэлгэрэнгүй санал солилцов. БНХАУ-д коронавирусийн тархалттай тэмцэж буй хүнд хэцүү цагт болсон энэ уулзалт нь хоёр улсын Иж бүрэн стратегийн түншлэлийн харилцаа дээд түвшиндээ хүрснийг нотолж, хөрш орнуудын үлгэр жишээч хамтын ажиллагааг дэлхий дахинаа харуулсан явдал боллоо хэмээн талууд уулзалтын төгсгөлд дүгнэв.

эх сурвалж :"Ардчилал таймс" сонин