Засгийн газраас Авто тээврийн тухай хуулийн төслийн шинэчилсэн найруулгын төслийг өнгөрсөн дөрөвдүгээр сард УИХ-д өргөн барьсан. Эл хуульд “Баруун талдаа жолооны хүрдтэй автомашиныг улсын бүртгэлд бүртгэхгүй, заалт 2021 оноос хэрэгжиж эхэлнэ” гэж оруулсан нь олны шүүмжлэлд өртөөд буй. Гэвч Зам, тээврийн хөгжлийн сайд Б.Энх-Амгалан “Хуулийн төсөлд тусгасан энэхүү заалтыг хасна, энэ заалт бол ажлын хэсгээс оруулж ирсэн санал” гэж сайд маань нүүрээ улалзахгүй худал хэлж орхисон юм.

Учир нь энэ хуулийн төслийг 2019 оны дөрөвдүгээр сарын 24-нд өргөн барьсан. Хуулийн төсөлд баруун хүрдтэй буюу “Приус” маркийн автомашиныг бүртгэхгүй байх заалт эхнээсээ л байсан гэсэн үг. Тодруулбал, хуулийн төслийн 23.7 дахь заалтад цагаан дээр хараар бичсэн байгаа. Угтаа бол Засгийн газраас, ялангуяа салбарын сайд Б.Энх-Амгалан өөрийн биеэр өргөн барьсан хуулийн төслөө боловсруулах шаардлага хэрэгцээ, тооцоо судалгаагаа хийсний үндсэн дээр боловсруулсан байх учиртай. Гэвч хэдэн өдөр хэвлэлээр бичигдэж, олны хэл амнаас айсан уу эсвэл үнэхээр буруу заалт оруулж ирсэн гэдгээ ухаарсан уу ямартай ч өөрийн боловсруулж оруулж ирсэн хуулийн заалтаа ажлын хэсэг оруулж ирсэн гэж худал хэлж, бусад руу буруугаа чихээд өөрийнхөө нэр хүндийг авч гарахыг оролдлоо. Энэ мэт У.Хүрэлсүхийн Засгийн газарт асуудлаа ойлгодоггүй сайд нар олон байх шиг байна.