Б.ЧИМЭГ

 УИХ-ын сонгууль ойртож, Монголын олон улс төрийн намууд нэг дээвэр дор нэгдэж байна. Энэ удаагийн УИХ-ын сонгуульд “Та бидний эвсэл” “Зөв хүн Электрад эвсэл” “Шинэ эвсэл” зэрэг нэлээн хэдэн эвсэл өрсөлдөхөөр бэлтгэж байна. Эдгээр эвслүүдээс “Шинэ эвсэл” нэлээн анхаарал татахуйц хэмжээнд яригдаж байгаа нь сонгуульд ялах магадлалтайдаа ч биш зорилготойгоор бусдын гар хөл болж оролцох гэж байгаагаараа анхаарал татаж байна. Шинэ эвслийн тэргүүн Ж.Батзандан, Л.Болд нар эвсэлдээ “Буян”-гийн Жаргалсайханыг татан оруулахаар болсон байгаа. Гэвч хэрэг дээрээ Ж.Батзандан, Л.Болд нар УИХ-ын гишүүн Т.Аюурсайхан, Л.Оюун-Эрдэнэ, Х.Нямбаатар нарыг дэмжих тохиролцоогоо хэдийнэ хийчихсэн сурагтай.
Тэдний дунд тохиролцоод байх асуудал ч бага. МАНАН дэглэмийг буулгасан гэдэг хийрхлээрээ энэ сонгуулиар гоёж, хамтдаа хөтлөлцөн өрсөлдөнө. Тус тусынхаа тойрогт бие биенийхээ байгуулсан гэх гавьяа, цаасан малгай хоёроор гоёх нь тодорхой. Харин Ж.Батзандан, Л.Болд нар яагаад ч юм “Буян”-гийн Жаргалсайханыг Т.Аюурсайханы нэр дэвших Чингэлтэй, Л.Оюун-Эрдэнийн тойрог Хэнтий, Х.Нямбаатар өрсөлдөх Сонгинохайран руу цөлөхөөр ятгаж байгаа сурагтай.
Сүүлийн үеийн мэдээгээр “Буян”-гийн Жаргалсайхан Чингэлтэй дүүргийг сонгож, Т.Аюурсайхантай өрсөлдөхөөр шийдэж яваа гэнэ. Тохиролцсон ёсоор Ж.Батзандан, Л.Болд нар сонгуулийн халуун цэг дээр “Буян”-гийн Жаргалсайханыг биш Т.Аюурсайханыг дэмжинэ. Энэ бүлэглэлийн шахалтад “Буян”-гийн Жаргалсайхан тэсэх нь юу л бол. Үйл явдлын дараа, УИХ-ын сонгуулийн дараа “Буян”-гийн Жаргалсайхан харин Ж.Батзандан, Л.Болд нарт агсан тавьснаар ялагдлын гомдлоо тайлах болов уу.

эх сурвалж :"Ардчилал таймс сонин"