УИХ-ын гишүүн О.Баасан­­­­­хүү өчигдөр (2020.04.22) Ардчилсан намын гишүүний батлахаа УИХ-ын гишүүн, Ардчилсан намын дарга С.Эрдэнээс гардан авлаа. Тэрбээр 1994 оны гуравдугаар сарын 7-нд Ардчилсан намын гишүүнээр элсч байжээ. УИХ-ын гишүүн, Ардчилсан намын дарга С.Эрдэнэ “Манай нам 200 гаруй мянган гишүүнтэй улс төрийн хүчирхэг нам. Бид улс төрийн ээдрээтэй нөхцөл байдал, хэцүү цаг үетэй нүүр тулж байгаа. Хэт олонхыг бүрдүүлж буй МАН 2016 онд дэвшүүлсэн мөрийн хөтөлбөрөө биелүүлж чадаагүй. Мөн цар тахлын үед эдийн засгийг эрчимжүүлэхээр авч хэрэгжүүлж буй арга хэмжээ нь үр нөлөөгөө өгөхгүй байна. 1994 онд манай намын гишүүн байсан О.Баасанхүү Ардчилсан намын гишүүнээр эргэн ирж, гишүүнчлэлээ сэргээж байгаад талархалтай байна” гэв.
УИХ-ын гишүүн О.Баасан­хүү “Аливаа ард­чиллын бүтээн байгуулалтад 300 жил хангалтгүй. Харин ардчиллыг устгахад гурван өдөр хангалттай гэдэг. Миний бие 1994 онд Ардчилсан намд элсч байсан. Өнөөгийн эрх баригч МАН дөрвөн жилийн хугацаанд өөрсдийгөө л өмөөрлөө. Сөрөг хүчнийг байхгүй болгочхож. Тиймээс сөрөг хүчин болох Ардчилсан намыг бүлэгтэй болгож, ард түмэнтэйгээ нэгдэж, хариуцлага нэхье гэж Ардчилсан намын гишүүнээ сэргээж байна. Ардчилал хүнийг нийгмийн гарал, итгэл үнэмшил, шашин шүтлэгээр нь ялгадаггүй. Ардчилсан нам болон журмын нөхөд надад итгэл үзүүлж байгаад талархаж байна. Олон хүний эр зориг, амь, амьдралын үнэ цэнээр Монгол Улсад бий болсон Ардчилалд бодит аюул нүүрлэсэн. Үгээ хэлсэн сэтгүүлчээ зоддог, үнэнийг хэлсэн хэн нэгнийг нийгмээрээ гутаан доромжилж байхад эрх, эрх чөлөөнийхөө төлөө тэмцэх, тусгаар тогтнолоо баталгаажуулах зайлшгүй шаардлага үүсч байгаа юм. Тиймээс ч иргэдтэйгээ хамтраад эрх баригчдаас хариуцлага нэхнэ.