Б.САНАА

 Ирж буй УИХ-ын 2020 оны сонгууль нэр дэвшигчдийн хувьд ч тэр сонгогчдын хувьд ч харьцангуй залуу хүмүүсийг сонгосон сонголт байх чигтэй байна гэлцэж байгаа. МАН залуучуудаа сонгуульд явуулна гэж байгаа боловч тус намаас хуучин гишүүд нь У.Хүрэлсүхээсээ зүүгдээстэй, нэр дэвших эрхийн төлөө ид улайрцгааж байна. АН-ын хувьд залуучуудаа дэмжих бодлогыг барьж байгаа гэдгээ зарласан. Харин сонгогч нарын хувьд Монголын улс төрд 30 жил эргэлдэж, төрийн өндөр албан тушаалыг ээлж дараалан хашсан хуучин улстөрчдөөс залхаж, тэднийг сонгохгүй гэсэн давалгаа тодорхой хүрээнд нэгэнт бий болоод байгаа. Хуучин бүхэн шинээр солигддог нь жам ёсны л үзэгдэл. Ертөнцийн энэ хууль бидний хүссэн хүсээгүй үйлчилсээр байдаг. Улс төрийн намууд ч энэ хуулиас тойрч гарч чадахгүй. Ирж яваа цагийн дууг харьж яваа цагийнхан дуулдаггүй гэгчээр цаг үеэ мэдэрч залуусаа дэмжих нь нийгэмд маш зөв зүйтэй гэдгээр харагдах болсон. Тухайлбал, УИХ-ын гишүүн асан Д.Одхүү өөрийн жиргээ хуудсандаа “Над шиг хойшоо бай л даа, залуучуудаа дэмжээд зөвлөөд яв. Энд нам хамаа байхгүй шүү. Бидний хүссэн хүсээгүй шинэ үе ирж байна” гэж жиргэжээ. Гишүүн асан Д.Одхүүгийн хувьд харьцангүй нас  хижээл биш ч гэлээ гол нь ирж буй цагийнхандаа туршлагатай нь боломжийг олгож дэмжих нь зөв юм. Нийгэм цаг үе ч үүнийг хүсч байна” гэдгийг илэрхийлсэн нь хүмүүсийн талархлыг багагүй хүлээсэн. АН-ын удирдлагаас ч нэр цэвэр, шинэ залуустаа боломжийг олгож дэмжих ёстой гэсэн зарчмын байр суурьтай байна гэдгээ илэрхийлж байгаа билээ.

эх сурвалж :"Ардчилал таймс сонин"