Т.ЭРДМАА

 МАН-ын хэсэг залуус нэгдэж УИХ-ын сонгуульд намаасаа нэр дэвшүүлж болохгүй хүмүүсийн нэрсийн жагсаалт гаргажээ. Ингээд тэд МАН-ын Хяналтын хороо болон намын дарга У.Хүрэлсүхэд өчигдөр уг нэрсээ хавсаргасан шаардах бичиг хүргүүллээ. Дашрамд дурдхад МАН-ын Бага хурал энэ долоо хоногийн баасан гарагт буюу тавдугаар сарын 15-нд болно гэсэн мэдээлэл бий. Энэ хурлаар УИХ-ын сонгуульд нэр дэвшигчдээ тодруулах аж. Ингээд МАН-ын гишүүн н.Мөнхболд сэтгүүлчдийн асуултад хариуллаа.

-Та бүхэн ямар учиртай шаардах бичиг, нэрсийн жагсаалтыг МАН-ын удирдлагуудад хүргүүлж байгаа юм бэ?
-Би 1994 онд МАН-д элссэн. Ямар нэг даргын хүн биш. Эгэл жирийн гишүүн. Намынхаа үйл ажиллагааг сайжрах байх гэж удаан харж, хүлээлээ. Сүүлдээ тэсэхээ болиод ийнхүү хөдөлж байна” хэмээсэн юм.
Бид намынхаа Хяналтын хороонд шаардах хуудас хүргүүлж байна. Энэ шаардах хуудаст бичсэн асуудлууд ард түмэнд өмнө нь хэвлэл мэдээллийн хэрэгслээр мэдээлэгдэж байсан. Гэтэл олон булхайтай асуудалд нэр холбогдсон хүмүүс УИХ-ын сонгуульд МАН-аас нэр дэвшинэ гэж Бага хуралд материалаа танилцуулж нэрсээ өгсөн байна.

Тухайлбал, Б.Чойжилсүрэн, Ц.Гарамжав, Б.Ундармаа, Ц.Цогзолмаа нар нэр дэвшинэ гэсэн байгаа юм. Тэд ямар ямар асуудал тарьсаныг хүмүүс мэддэг болсон шүү дээ. Хэрэв энэ шаардах хуудаст нэрс нь бичигдсэн хүмүүсийг нэр дэвшүүлэх юм бил бид МАН-ын сонгуулийн үйл ажиллагаанд оролцохгүй. Бид хэвлэлийн бага хурал хийх гэсэн болов ч цар тахлын хөр хорионы улмаас чадсангүй.
-Та бүхний нэр дурдсан энэ гурван хүний тухай л асуудал юм уу. Өөр улстөрчдийн нэр энэ тавьж буй шаардлагад байгаа юу?
-ЖДҮ, 60 тэрбумд холбогдсон хүмүүсийг УИХ-ын сонгуульд нэр дэвшүүлэхгүй байхыг шаардсан. Би зүгээр жишээ татаж дээрх хүмүүсийн нэрсийг хэлж байгаа юм. Бид шинэ залуу хүмүүсийг нэр дэвшүүлээсэй гэж хүсч байгаа. Бид өөрсдөө эрэн сурвалжлаад гаргаж ирсэн нэрс биш. Бусармаг үйлдэл гаргасан гэж олон нийтэд мэдээлэгдсэн хүмүүсийг л ярьж байгаа. Жишээ нь УИХ-ын гишүүн Ц.Цогзолмаа Хөдөлмөр эрхлэлтийг дэмжих сан­гаас мөнгө авсан. Одоо Ховдод нэр дэвшинэ гээд явж байгаа гэсэн. УИХ-ын гишүүн Б.Чойжилсүрэн барилгаа барьж дуусаагүй байж буцаан олголт гээд 35 тэрбум төгрөг төсвөөс авсан гэдэг. Мөн ЖДҮ-чин гишүүд УИХ-д дахиад нэр дэвшинэ гээд явж байгааг бид эсэргүүцэж байгаа юм.
-Тэгэхээр УИХ-ын сонгуульд нэр дэвшүүлж болохгүй нэрсийн жагсаалтад яг хэдэн хүн байгаа юм бэ?
-Энэ бол намын дотоод асуудал. Өнөөдөр бид шаардах бичгээ өгч байна. Асуудал цаашид хэрхэн өрнөхийг харна. Намын хяналтын хорооны даргад бичгээ өгнө. Эхний ээлжинд бид МАН-ын Бага хурал тавдугаар сарын 15-нд хуралдахаас өмнө асуудлыг тавьж буй юм. Бидэнд 48 цагийн дотор хариу өгөх талаар уг шаардлагад тодорхой бичсэн байгаа.
-Та бүхний шаардлагад хариу өгөхгүй, арга хэмжээ авахгүй бол яах вэ?
-Цаашид хариу өгөхгүй, ямар нэг арга хэмжээ авахгүй бол улстөрийн суулт хийнэ. Өлсгөлөн зарлаж ч магад. Өнөөдөр энд олон хүн ирнэ гэсэн боловч бид ирүүлээгүй. Учир нь цар тахлын үед олон хүн цуглуулахыг хориглосон байгаа. Дээрх хэрэгт нэр холбогдсон гишүүдийг нэр дэвшүүлэхгүй байх гэж бид найдаад өдий хүртэл чимээгүй явлаа. Гэтэл бүгд УИХ-ын сонгуульд дахин дэвших гээд нэрээ өгчихсөн байна. Цахимаар сонголт нь явагдаад нэр дэвшүүлнэ гээд гараад ирчихэж. Үүнийг хараад сууж чадахгүй. Бид энэ бичгийг өгчихөөд зүгээр суухгүй. Ямар ч байсан нэр дэвшүүлэхгүйн төлөө тэмцэнэ.
-Та бүхэнтэй МАН-ын хэдэн гишүүн нэгдсэн бэ?
-Бид энэ нь ЖДҮ-чин, тэр нь 60 тэрбумын талынх гэсэн ойлголт байхгүй. МАН-ын л гишүүд. Бидний нээсэн цахим хуудаст хандалт их байна.

ЭХ СУРВАЛЖ: "АРДЧИЛАЛ ТАЙМС" СОНИН