Ардчилсан Намын Үндсэн бодлогын хорооны 15-р хуралдаан эхэллээ. Хуралдааны эхэнд Сонгон шалгаруулалтын хороо хуралдаж намын анхан шатны байгууллагуудаас ирүүлсэн нэр дэвшүүлэх саналыг хэлэлцэж байна. Ардчилсан намын сонгон шалгаруулалтын хороогоор нэр дэвшигчдийг тодруулсаны дараа Үндэсний бодлогын хороогоор хэлэлцэж баталгаажуулна гэж эх сурвалж мэдээллээ. Үндэсний бодлогын хорооны гишүүд 14.00 цагт нууцаар саналаа өгч эхлэх аж.  АН-ын ҮБХ-ны хуралдааны талаар тус намын Хэрэг эрхлэх газрын дэд дарга Б.Баттулга мэдээлэл өглөө. 

-ҮБХ-ны хурлыг ямар байдлаар зохион байгуулж байгаа вэ?

-Сонгуулийн хууульд зааснаар нам, эвслүүд нэр дэвшигчдээ тодруулж СЕХ-нд барим бичгээ өгөх хуулийн хугацаа өнөөдрөөр дуусгавар болно. Тиймээс цар тахлын дэгдэлттэй холбоотойгоор АН энэ удаагийн хурлаа цахимаар зохион байгуулж байна. Өнөөдрийн 12:00 цагаас эхлэн ZOOM апплекэйшнийг ашиглан ҮБХ-ны 400 гаруй гишүүний хурлыг цахимаар хийж байна.

Хурлын үйл явцын мэдээллийг өнөөдрийн 20:00 цагт намын удирдлагууд мэдээлнэ. 

-Нэр дэвшихээр нэр нь тодорхой болсон хүмүүс намдаа 100 сая төгрөг хандивласан гэсэн үг үү?

-АН-ын дүрмийн дагуу Сонгон шалгаруулах хорооноос ҮБХ-ны хуралдаанд нэр дэвшихээ илэрхийлсэн хүмүүсийн нэрсийн жагсаалтыг өргөн барина. Үүний дараа ҮБХ хуралдаж нэр дэвшигчдийн тодруулна. Намын дотоод журмаар ҮБХ-ноос тогтоосон намын татвартай холбоотой асуудлыг бүх нэр дэвшигч хангасан. 

-Орон нутагт байгаа ҮБХ-ны гишүүд хуралдаандаа хэрхэн оролцож байгаа вэ? 

-Интернэтийн сүлжээгээр бүх орон нутгаас гишүүд маань холбогдож байна. ҮБХ-ны гишүүдийн ихэнх нь Улаанбаатар хотод байгаа. 

-Өнөөдөр оройн 20:00 цаг гэхэд нэр дэвшигчид тодорхой болно гэсэн үг үү?

-20:00 цагт хурлын үйл явцын талаар мэдээлэл хийнэ. Нэр дэвшүүлэх ажиллагаа түүнээс хойш ч үргэлжилж магадгүй. Ямар ч байсан өнөөдрийн 00:00 цагаас өмнө СЕХ-нд албан ёсоор шийдвэрээ гардуулж өгөх ёстой. 

-МАН ЖДҮ-д холбогдсон хүмүүсээ нэр дэвшүүлэхгүй гэсэн. Танай намын хувьд тодорхой шалгуур тавьж байгаа юу?

-Аливаа хүн хууль хяналтын байгууллагад шалгагдаж байгаа бол дэвших боломжгүй. Нэр дэвшигчдийн бүрдүүлэх материалд цагдаагийн байгууллагын тодорхойлолт гэж юм бий. Тэр шалгууруудыг хангасан хүн нэр дэвшигчийн үнэмлэхээ авна. Дэвших боломжтой үгүйг манай нам шийдэхгүй. 

Гол шалгуур бол тухайн нэр дэвшихээр горилогчийн талаар дунд шатны байгууллагаас саналыг нь авч, ҮБХ-гоор хэлэлцэнэ. Дээрээс нь судалгааны дүн зэрэг олон талын шалгуурыг Сонгон шалгаруулах хороо авч үзээд намын удирдлагуудад танилцуулна. Үүн дээр ҮБХ-ны гишүүд саналаа өгч шийдвэрлэнэ.