Ардчилсан намын нэр дэвшигчд өнөөдөр тодорно. Энэ талаар УИХ-ын гишүүн З.Нарантуяа мэдээлэл хийлээ. Тэрбээр хэлэхдээ “Өнөөдөр АН-ын ҮБХ хуралдаж байна. Хурлаар намын даргыг солино гэсэн мэдээлэл цацагдсан байна. Ер нь АН-ын дүрмэнд даргыг чөлөөлөх асуудалд үндэслэл бүхий заалтууд байдаг. Өнөөдрийн хурлаар зөвхөн нэр дэвшигчдийг тодруулна. Тиймээс энэ бол ор үндэсгүй мэдээлэл гэдгийг албан ёсоор мэдэгдье” гэлээ.

Тэрбээр үргэлжлүүлэн сэтгүүлчдийн асуултад хариуллаа.

-Намын даргын үзэмжээр нэр дэвшигчдийг сонгож байна гэсэн яриа гараад байгаа энэ талаар?

-Намын дарга түрүүлээд нэр дэвшигчдээ сонгосон зүйл байхгүй. Ямар ч байсан нэр дэвшихээр хүсэлтээ өгсөн бүх хүмүүсийг сонгон шалгаруулах хороон дээр хэлэлцэж байгаа.

-Ардчилсан нам эмэгтэйчүүдээ хэр дэмжиж байгаа вэ?

-Ардчилсан намын дэргэдэх Ардчилсан эмэгтэйчүүдийн холбоо сүүлийн хоёр жил эмэгтэйчүүдээ бэлдэх ажилд анхаарч ажилласан. Манай намд олон залуу эмэгтэйчүүд орж, улс төрд биеэ бэлтгэх, өөрийн тойрог дээр манлайллаа харуулах ажлаа хийсэн. Манайд хангалттай олон эмэгтэйчүүд байгаа. Нэр дэвшихээ илэрхийлсэн 20 гаруй эмэгтэй бий. Хуулийнхаа дагуу бол 16 эмэгтэй нэр дэвших ёстой.