УИХ-ын гишүүн О.Баасанхүү Эрдэнэт үйлдвэрийн хийсэн гэрээнүүдийг хууль зөрчсөн хэмээн үзэж шалгуулахаар АТГ-т өнөөдөр хүргүүллээ. 

Тэрбээр "2019 оны гуравдугаар сарын 6-аас хойш МУ-ын ЗГ-аас Эрдэнэт үйлдвэрт онц байдал зарлаж өнөөдрийг хүртэл онцгой дэглэмийн үйл ажиллагаа явуулж байгаа. 1995 онд батлагдсан онцгой байдлын үеийн хууль гэж байдаг. Үүнд аливаа төрийн болон хувийн өмчийн компани онц байдал зарлаж байгаа бол тухайн онц байдлын үед хойшлошгүй хийх тодорхой арга хэмжээнээс бусад тохиолдолд ямар нэгэн худалдан борлуулалт хийх хориотой байдаг. Гэтэл 2019 оны тавдугаар сарын 11-нд 9,8 тэрбумыг ямар ч гэрээгүй хийсэн. Гэрээгүй хийсэн компаниудын нийт үнийн дүнг нь харвал хамгийн багадаа 205 сая төгрөгний гэрээ байгаа юм.

Гэрээнүүдийг тооцож үзвэл нийтдээ 150 сая доллар бүхий 91 гэрээг байгуулсан байна. Үүн дотор зөвхөн нэг компани гэхэд л 324 тэрбум төгрөгийн гэрээ байгуулжээ. Тиймээс үүнийг би улс төрийн шахаа байх магадлалтай гэж үзэж байна.

Эрдэнэт үйлдвэрт гэрээ хийж болно. Тэр нь компанийн хэвийн үйл ажиллагааг хангахын тулд хойшлуулахгүй гэрээ байх ёстой. Түүнээс биш жил хүрээгүй хугацаанд нэг их наядын гэрээ хийж болохгүй.

Хуулиндаа төрийн, хувийн ямар ч компани 50 сая төгрөгөөс дээш худалдан авалтын гэрээ хийж буй тохиолдолд заавал тендер зохион байгуулах ёстой. Тиймээс энэ бол тендерийн хууль зөрчсөн хэрэг.

Мөн 91 гэрээний 55 нь хятадын компанитай хийсэн гэрээ байна. Ажлын гүйцэтгэлээ хийхийн тулд багадаа 40-50 хятад хүнийг ажиллуулна. Эрдэнэтэд багадаа 2000-3000 хятад иргэн байнгын оршин сууж амьдрах нөхцөл үүсэж байна гэсэн үг. Тиймээс үүнд тайлбар авах ёстой” гэлээ.

Мөн үүний ард хэн байгаа вэ хэмээх сэтгүүлчийн асуултад тэрбээр “Төрийн өмчийн оролцоотой компанийг Засгийн Газрын хэрэг эрхлэх газар хариуцаж байгаа. Энэ бүх гэрээг нягтлаад үзвэл хамаарал бүхий хүмүүс нь гараад ирнэ. Яагаад гэвэл мөнгө мөрөө үлдээдэг. Мөнгө зүгээр ургадаггүй” гэж хариуллаа.