УИХ-ын ээлжит сонгууль болох гэж байгаатай холбогдуулан гишүүд өнгөрсөн дөрвөн жилд хийж, хэрэгжүүлсэн ажлаа иргэддээ тайлагналаа.
УИХ-ын гишүүн Ардчилсан намын дарга С.Эрдэнэ “Санаачлан боловсруулж, батлуулсан хууль, тогтоомжийн тайлан” нэртэй 153 хуудас бүхий товхимолыг иргэддээ тараав. Тус тайланд нийгэм, эдийн засаг, хууль эрх зүй, хөрөнгө оруулалтын тухай 146 тогтоол шийдвэрийн төсөл, 71 хуулийн төсөл санаачлан боловсруулж 60 орчим хувийг нь буюу 41 хуулийн төслийг УИХ-ын чуулганаар хэлэлцүүлэн батлуулсан тухай тайлагнажээ. Уг тайланд бусдын фото зургийг ашигласан болон өөрийгөө сурталчилсан ярилцлага, том том амлалт бус хийж, хэрэгжүүлсэн ажлын тухай л багтжээ.

Тэгвэл УИХ-ын гишүүн, Эдийн засгийн байнгын хорооны дарга Ж.Ганбаатарын “Баянгол хөгжил” нэртэй ажлын тайланд өнгөрөгч дөрвөн жилд УИХ-д ажилласан байдал. Эдийн засгийн байнгын хорооны даргын үйл ажиллагаа, тойрогтоо хийсэн ажлуудын талаар өнгөт сэтгүүл тараагджээ. Үүнд зочин, мэндчилгээ, гэр бүлийн байдал, иргэдтэй хийсэн уулзалт, чөлөөт цаг, улстөрчийн байр суурь нь ажлын тайлан гэхээс илүү өөрийгөө олон нийтэд таниулах зорилго бүхий сурталчилгаа гэж хэлж болохоор байна. Мөн өөрийн бизнес болох “Оргил” худалдааны төвөө дурсамж фото зургуудаар баяжуулан сурталчилжээ. Үүнээс үзэхэд УИХ-ын гишүүн Ж.Ганбаатар нэг ч хууль санаачлаагүй, өнгөрөгч дөрвөн жилийг бизнесээ өргөжүүлэхэд зориулжээ.