Монгол Улсын Үндсэн хуулийн нэмэлт өөрчлөлт өнөөдөр (2020.05.25) 12:00 цагаас хүчин төгөлдөр хэрэгжиж эхэллээ. УИХ-ын даргын зөвлөх Ж.Сүхбаатарын мэдээлснээр, Үндсэн хуулийн зарим зүйл заалтыг хэрэгжүүлэхийн тулд бусад хуулиа нийцүүлэн өөрчлөх шаардлага тулгарч буй бөгөөд энэ ондоо багтаан тус ажлыг дуусгах ажээ. Үндсэн хуулийн нэмэлт, өөрчлөлтийг дагалдан Сонгуулийн тухай, Улс төрийн намуудын тухай, Засаг захиргаа, нутаг дэвсгэрийн нэгж, түүний удирдлагын тухай, Үндэсний баялгийн сангийн тухай, Шүүхийн тухай хууль зэрэг 40 орчим хуульд нэмэлт, өөрчлөлт орно. Эдгээр өөрчлөлт нь Монгол Улсад хууль, эрх зүйн хувьсгал хийх эхлэл болж, нийгэмд шударга ёс, хариуцлагын тогтолцоо бэхжих үндэс суурь болох юм.
Үндсэн хуулийн өөрчлөлтөөр УИХ-ын гишүүд иргэдээ төлөөлөх, хуулиа хэлэлцэн батлахаас гадна хуулийн хэрэгжилтийг хянан шалгах эрх мэдэлтэй болсон. Давхар дээлийн асуудлыг цэгцэлж, Засгийн газрын дөрвөн сайд л Улсын их хурлын гишүүн байж болох юм. Мөн хуулийн өөрчлөлтөөр УИХ-ын гишүүдийн төсөв, татвар зэрэг улс орны эдийн засгийн суурь болсон хуулиудад шууд хүрэх эрхийг хязгаарлажээ. Олон улсын жишгээр нэг биш олон гишүүн нэгдэж байж ийм төрлийн хуульд гар хүрэх зохицуулалт хийсэн байна. УИХ-аар Монгол Улсын Үндсэн хуульд оруулсан нэмэлт, өөрчлөлтийг 2019 оны арваннэгдүгээр сарын 14-ний өдөр баталсан. Уг нэмэлт, өөрчлөлтөөр Үндсэн хуулийн 28.5 хувийг буюу 70 зүйлийн 19 зүйл, 35 заалтыг хөндсөн юм. Одоогоос 27 жилийн тэртээ 1992 оны нэгдүгээр сарын 13-ны өдөр нийгмийн харилцааны язгуур үндэс болсон хүний эрх, эрх чөлөөг дээдэлсэн иргэн төвтэй төр улсыг шинэ Үндсэн хуулиараа тунхаглан баталсан билээ.