УИХ-ын сонгуулийн 28-р тойрог буюу Сонгинохайрхан дүүрэгт АН-аас намаас нэр дэвшигчид МАН-аас тус тойрогт нэр дэвшигчдийг халз мэтгэлцээнд урилаа. Мэтгэлцээнийг телевизээр бус, хархорин зах дээр ард иргэдтэй хийх гэнэ. Хэвлэлийн хурлын эхэнд АН-ын нарийн бичгийн дарга О.Магнай “Бид сонгуулийн сурталчилгаа эхлээд найм хонолоо.  Иргэд сонгогчидтой уулзалтаа хийсээр байна. Энэ хугацаанд иргэд болон эрх баригчдын ярьж байгаа зүйлүүд алд дэлэм зөрөөтэй байгаа нь анзаарагдсан. Тиймээс эрх баригч МАН-ын Сонгинохайрхан дүүрэгт нэр дэвшигчдийг багаар нь халз мэтгэлцээнд урьж байна. Мэтгэлцээнийг ямар нэгэн телевизийн эфирт биш, хархорин зах дээр энэ сарын 10-нд 12 цагаас хийнэ. Бид иргэдийн нүдэн дээр, хоёр талд суугаад, нүүр нүүрээ харан асуудлуудаа ярина. Ингэснээр иргэдэд зөв сонголтоо хийх боломж бүрдэнэ гэж үзэж бодож байна” гэлээ.

П.Цэцэгмаа “бид өнөөдрийн байдлаар нийт 11 хорооны иргэдтэйгээ уулзалт хийлээ. Сонгууль бол бодлогын өрсөлдөөн байх ёстой. Тиймээс өнөөгийн цар тахалтай байгаа үед ирээдүйд хийж хэрэгжүүлэх бодлогоо танилцуулж мэтгэлцэх нь иргэдэд оновчтой сонголт хийхэд нь туслах болно” гэв.

Г.Очирбат “Ард иргэд маань бидэнд боловсруулсан мөрийн хөтөлбөрөө барьж байгаад мэтгэлцээч гэж хүсэлт тавьсан. Тиймээс мөнгөөр биш мөрийн хөтөлбөрөөр өрсөлдье. Бодож боловсруулсан мөрийн хөтөлбөрийнхөө зүйл заалт болгоноор нь мэтгэлцье. Яг бодитой статистик тоо баримттай, судалгаагаатай мэтгэлцье. Үүний дараа иргэд сонголтоо хийхэд илүү амар байх болов уу. Мэтгэлцээн хийх саналыг МАН-ын нэр дэвшигчид хүлээн авна гэж найдаж байна” гэж хэллээ.