УИХ-ын сонгуулийн сурталчилгаа эхлээд удаагүй байна. Хэдийгээр намууд, бие даагчид сонгуулийн сурталчилгаагаа хийхдээ холбогдох хуулийг чанд мөрдөж, элдэв зөрчил гаргасан тухай мэдээлэл дуулдаагүй байсан ч Өвөрхангай аймгийн МАН-ын нэр дэвшигчид хууль зөрчсөн шинжтэй үйлдэл хийв. Тодруулбал, УИХ-ын Сонгуулийн Өвөрхангай аймагт 10 дугаар тойргоос МАН-аас нэр дэвшигч МАН-ын бүлгийн дарга Д.Тогтохсүрэн, Нийгмийн хамгааллын сайд Д.Чинзориг, Өвөрхангай аймгийн засаг дарга Г.Ганболд нар сонгуулийн сурталчилгаа хийх явцад буюу 2020 оны зургадугаар сарын 2-ны өдөр тус аймгийн Бат-Өлзий суманд урлагийн тоглолт зохион байгуулж, сонгуулийн хууль зөрчсөн талаар Ардчилсан намын зүгээс СЕХ-нд шаардлага хүргүүлж, хуулийн дагуу арга хэмжээ авахыг хүслээ.
Өвөрхангай аймагт МАН-аас нэр дэвшигчид Бат-Өлзий суманд хийсэн уулзалтын үеэр урьдаас бэлдсэн урлагийн тоглолт, дуу бүжгийн үзүүлбэрийг тайзнаа гаргасныг тухайн үед тус штабын ажилтнуудын Фэйсбүүк лайв дамжуулалтаар анх олон нийтэд хүрсэн юм. Ингэснээр хуулийн дагуу тухайн нэр дэвшигчид нэрээ татуулж ч болзошгүй нөхцөл байдалд хүрээд байна. Учир нь Сонгуулийн тухай хуулийн 48.1-д зааснаар сонгуулийн сурталчилгаа хийх явцдаа урлагийн тоглолт зохион байгуулахыг хориглоно, энэхүү хуулийг зөрчвөл сонгуулийн тухай хуулийн 75.2-т зааснаар тухайн нэр дэвшигчийн нэрийг нэр дэвшигчийн жагсаалтаас хасч, олон нийтэд хүргэх заалттай байна.

ЭХ СУРВАЛЖ: "АРДЧИЛАЛ ТАЙМС" СОНИН