АНУ Оростой зэвсэглэлд хяналт тавих асуудлаар зургадугаар сард багтаан хэлэлцээр хийнэ гэж АНУ-ын Ерөнхийлөгчийн зэвсэглэлд хяналт тавих тусгай төлөөлөгч Маршалл Биллингси мэдэгдсэн байна. “Цөмийн зэвсгийн асуудлаар энэ сард хийх хэлэлцээрийг хаана хэзээ хийх талаар өнөөдөр Оросын гадаад хэргийн дэд сайд Рябковтай тохиролцлоо” гэж Биллингси Twitter хуудсандаа бичжээ. Хэлэлцээрт бас Хятадыг оролцуулахаар урьсан, Бээжин оролцох эсэх нь тодорхойгүй байна гэж тусгай төлөөлөгч хэлсэн байна.
АНУ-ын Төрийн департаментын төлөөлөгч үүний өмнө хэлэлцээрийг зургадугаар сарын 22-нд Австрийн нийслэл Венад болно гэснийг “Bloomberg” агентлаг дамжуулж байсан. Энэ хэлэлцээрээр Орос хэрвээ Хятадыг татан оролцуулж чадах юм бол Стратегийн давшилтын зэвсэглэлийг хорогдуулах, устгах хэлэлцээрийг (СНВ-3) сунгах, цаашдын арга хэмжээний талаар ярилцана гэсэн байна.
Зэвсэглэлд хяналт тавих тогтолцоо үгүй болж байгаа нь дэлхий дахины тогтвортой байдалд аюул учруулж байна хэмээн ОХУ-ын Ерөнхийлөгч Владимир Путин өнгөрөгч хоёрдугаар сард мэдэгдээд үүний улмаас Москва Вашингтонтой яриа хэлэлцээрт ороход бэлэн байна гэж онцолжээ. Тэгэхэд Цагаан ордны Аюулгүй байдлын зөвлөх Роберт О’Брайен Орос, Хятад улс зэвсэглэлд хяналт тавих асуудлаар хэлэлцээр хийхээс татгалзаж байгаагаараа АНУ-аас ялгаатай гэж хэлж бай. Стратегийн давшилтын зэвсэглэлийг хорогдуулах, устгах (СНВ-3) шинэ хэлэлцээрт ОХУ-ын Ерөнхийлөгч Дмитрий Медведев, АНУ-ын Ерөнхийлөгч Барак Обама нар Чехийн нийслэл Прагад 2010 оны дөрөвдүгээр сарын 8-нд гарын үсэг зурсан. Энэ гэрээгээр 1994 оноос хэрэгжиж эхэлсэн СНВ анхны хэлэлцээрийг өөрчилж 2009 оноо үйлчлэхээр тогтоосон. Өнөөдөр үйлчилж байгаа СНВ-3 хэлэлцээр нь 2021 он хүртэл үйлчилж, талууд хэрвээ зөвшөөрвөл таван жилээр сунгахаар болжээ. Дунд болон ойрын тусгалтай пуужин устгах гэрээнээс АНУ дангаараа 2019 оны наймдугаар сард гарсан. Үүнийгээ тэд Орос улс гэрээг зөрчин 9М729 пуужин үйлдвэрлэж байгаатай холбоотой гэж тайлбарласан.

ЭХ СУРВАЛЖ: "АРДЧИЛАЛ ТАЙМС" СОНИН