Шинэ УИХ-ын танхим бүрдээд тун удаагүй байна. Чуулганы хуралдаанаар эдийн засагч мэргэжилтэй Т.Доржханд Ерөнхий сайд У.Хүрэлсүхэд хандан чухал гурван захиас хэлэв. Нэгдүгээрт, Засгийн газрын бүтэц, бүрэлдэхүүн цомхон чадварлаг баймаар байна. Засгийн газрын төрийн үйлчилгээг цахимжуулах ажлыг яаралтай эхлүүлмээр байна. Засгийн газрын бүтэцдээ технологи, инновацийн яам байгуулах хүсэлтийг гаргаж байна. Хоёрдугаарт, нэгэнт Та өөрөө Засгийн газрыг байгуулах Үндсэн хуулийн өөрчлөлтөөр эрх мэдэл олгогдож байгаа тул мэргэжлийн Засгийн газар байгуулах ёстой. Өнгөрсөн 2016 оны алдааг давтмааргүй байна. Ялангуяа “Ковид-19”-ын хямрал, хар саарал жагсаалт, бондын төлбөр, төсвийн алдагдал гэх мэт маш олон бэрхшээл сорилттой нүүр тулж байна. Тийм болохоор санхүү эдийн засгийн газар хариуцсан сайд мэргэжлийн, өндөр чадвартай байх ёстой. Боловсрол, эрүүл мэндийн салбарт мэргэжлийн шинэчлэл хийх боломжтой залуучуудыг тавихыг хүсч байна. Гуравдугаарт, бүтцийн хувьд шаардлагагүй орон тоо буюу дэд сайд, агентлагийн дарга, газрын дэд дарга гэх мэт үр ашигггүй албан тушаалыг та зоригтойгоор цомхотгож өгөөч. Ялангуяа төсвийн ачаалалтай хүнд үед үр ашиггүй албан тушаалыг хасч өгөөч гэсэн хүсэлтийг тавья гэв. 

Ийнхүү УИХ-ын гишүүн Т.Доржханд аргагүй эдийн засгийн асуудлыг хамгийн сайн гадарлах хүний хувьд Ерөнхий сайдад тун чухал захиасыг хэлж байв. Мөн тэрээр ойрын хэдэн жилд санхүүгийн салбарт шинэчлэлт хийгдсэнгүй. Банкны салбарын реформыг явуулмаар байна. ОУВС-гийн хүрээнд энэхүү шинэчлэлтийг хийх хэрэгтэй байсан ч энэ хийгдэхгүй гацчихаад байна. Блокчэйн технологийг үндэслэн хөрөнгийн зах зээл, бондын зах зээлийг хурдан идэвхжүүлэх шаардлага байна гэв. УИХ-ын гишүүн Т.Доржханд Ерөнхий сайд У.Хүрэлсүхэд ямар улс хөгжсөн байна вэ гэвэл Засгийн газар нь бизнесээс хамааралгүй, Засгийн газар улс төрөөс ангид улс л хөгжсөн байдаг. Таны хувьд түүхэн үүрэг гүйцэтгэх цаг ирсэн. Бизнесийн ашиг сонирхлоос ангид Засгийн газраа тусад байгуулах ёстой шүү гэж үүрэгдэв. Одоо У.Хүрэлсүх эдийн засгийг хамгийн сайн мэдэх чадварлаг эдийн засагч Т.Доржхандын үүрэг даалгаврыг хэрхэн биелүүлэхийг харах үлдлээ.

Б.ОДМАА