Ардчилсан намын удирдлагууд өчигдөр цаг үеийн асуудлаар мэдээлэл хийлээ. Ардчилсан намын X их хурлыг наймдугаар сарын 23-нд зарлан хуралдуулах шийдвэр гарсан байна.

Ардчилсан намын дарга С.Эрдэнэ:

-УИХ-ын найм дахь удаагийн сонгууль болж өнгөрлөө. Сонгуулийн үр дүнгээр шинэ парламент бүтэц бүрэлдэхүүнээ томилж эхэлж байна. Гэхдээ 2020 оны УИХ-ын сонгуулийн будлиан маргаан дуусаагүй. Энэ сонгуулиар хууль зөрчсөн байх эсэх асуудлыг улс төрийн намууд хамтарч шалган тогтоолгох талаар ажиллаж байгаа. Цаашид энэ ажил үргэлжлэх байх. Ардчилсан нам өнөөдөр улс төрийн хариуцлагатай хүчний хувьд УИХ-ын сонгууль болон нийгэм, улс төрийн тогтвортой байдлыг эрхэмлээд асуудалд хүндэтгэлтэй хандаж байгаа. Ардчилсан нам дотоод үндсэн дүрэмтэй. Энэ дүрмээ Улсын дээд шүүхэд бүртгүүлж хуулийн хүрээнд үйл ажиллагаа явуулж байгаа улс төрийн нам. Ийм учраас Ардчилсан нам өнөөдөр дотоод үндсэн дүрмийн хүрээнд үйл ажиллагаа зохицуулж, зохион байгуулж ажиллаж байна. Гэхдээ өнөөдөр үндсэн дүрмийн бус аливаа үйл ажиллагааг бид хүлээн зөвшөөрөхгүй. Ардчилсан намын үндсэн дүрмийн хүрээнд холбогдох байгууллагууд шийдвэрээ гаргаж үйл ажиллагаагаа зохион байгуулж байна. Ардчилсан нам Үндсэн дүрмийнхээ дагуу намын Их хурлыг зарлан хуралдуулах ёстой. Намын даргын бүрэн эрхэнд бий. Тиймээс энэ сарын 02-ны өдөр тушаалаа гаргасан. Ардчилсан намын Үндсэн дүрмийн 5.17.1, 5.12.2 дахь заалтыг үндэслэн намын Х их хурлыг 2020 оны наймдугаар сарын 23-ны өдөр зарлан хуралдуулна. Энэ хуралдаанаар Ардчилсан намын бүх гишүүдийн саналаар сонгогдсон шинэ намын даргыг батламжлах, ёсчлох болон бусад асуудлыг хэлэлцэнэ хэмээн мэдээллээ.

Ардчилсан намын Дотоод сонгуулийн хорооны дарга И.Мөнхжаргал:

-Ардчилсан намын даргын сонгуулийг товлон зарлаж байна. Долдугаар сарын 6-9-ний хооронд Ардчилсан намын даргад нэр дэвших хүмүүсийн бүртгэл явагдана. Мөн энэ сарын 16-наас наймдугаар сарын 14-ний хооронд намын даргын сонгуулийн сурталчилгаа явагдана. Харин санал хураалт наймдугаар сарын 16-нд явагдана. Тус сонгуульд өнөөдрийг хүртэл бүртгэлтэй Ардчилсан намын 200 гаруй мянган гишүүн саналаа өгөх эрхтэй. Ардчилсан намын даргад нэр дэвшигчээс ямар нэгэн дэнчин, бүртгэлийн хураамж авахгүй. Зөвхөн хөндлөнгийн аудитын байгууллагаар хянагдсан сонгуулийн зардлыг хувь тэнцүүлэн гаргуулахаар зохион байгуулна. Өнөөдрөөс Ардчилсан намын даргын сонгуулийн бүртгэл эхэлснийг мэдэгдэж байна.